uljhan ki kahani

ek akahrā dūsrā dohrā tīsrā hai so tihrā hai

ek akahre par pal pal ko dhyān kā ḳhūnīñ pahra hai

dūsre dohre ke raste meñ tīsrā khel kā mohara hai

tīsrā tihra jo hai us kā sab se ujāgar chehra hai

goyā akahrā pahrā dohra mohrā tihrā chehra hai

ek akahrā kāġhaz dohrā tihrā ho kar naav banī

naav se pal bhar bachche bahle khel khel meñ ghaao banī

ghaao banī to dil meñ dhyān ye aayā kah deñ aao banī

ban ban kar jo khel bigaḌ jaate haiñ un kī baat nahīñ

koī janāza bhī ye nahīñ hai aur koī bārāt nahīñ

ye ik aisā din hai jis ke aage pīchhe raat nahīñ

tihre kī har tah meñ yuuñ to ek nayā hī chehrā hai

lekin har ek chehrā us bin khele khel kā mohrā hai

jis kā rañg akahrā hai

aage baat baḌhā.eñ kaise baat bane to baat baḌhe

ab tak rañg akahrā thā gar koī baḌhā to haath baḌhe

honī kī to riit yahī hai chhoTe din kī raat baḌhe

ab to jo bhī baḌhnā chāhe apne saath hī saath baḌhe

aage pīchhe dauḌ dauḌ kar ik aage ik pīchhe hai

pīchhe vaalā kaise baḌhe jab aage vaalā bhī dauḌe

donoñ choT barābar kī haiñ ye donoñ se kaun kahe

haar aur jiit isī meñ hai ab kaun ruke aur kaun baḌhe

ek akahra dusra dohra tisra hai so tihra hai

ek akahre par pal pal ko dhyan ka KHunin pahra hai

dusre dohre ke raste mein tisra khel ka mohara hai

tisra tihra jo hai us ka sab se ujagar chehra hai

goya akahra pahra dohra mohra tihra chehra hai

ek akahra kaghaz dohra tihra ho kar naw bani

naw se pal bhar bachche bahle khel khel mein ghao bani

ghao bani to dil mein dhyan ye aaya kah den aao bani

ban ban kar jo khel bigaD jate hain un ki baat nahin

koi janaza bhi ye nahin hai aur koi baraat nahin

ye ek aisa din hai jis ke aage pichhe raat nahin

tihre ki har tah mein yun to ek naya hi chehra hai

lekin har ek chehra us bin khele khel ka mohra hai

jis ka rang akahra hai

aage baat baDhaen kaise baat bane to baat baDhe

ab tak rang akahra tha gar koi baDha to hath baDhe

honi ki to rit yahi hai chhoTe din ki raat baDhe

ab to jo bhi baDhna chahe apne sath hi sath baDhe

aage pichhe dauD dauD kar ek aage ek pichhe hai

pichhe wala kaise baDhe jab aage wala bhi dauDe

donon choT barabar ki hain ye donon se kaun kahe

haar aur jit isi mein hai ab kaun ruke aur kaun baDhe