uljhanen

zabāñ ko tarjumān-e-ġham banā.ūñ kis tarah 'kaifī'

maiñ barg-e-gul se añgāre uThā.ūñ kis tarah 'kaifī'

samajh meñ kis kī aa.e raaz mere hichkichāne kā

añdhere meñ chalā kartā hai har nāvak zamāne kā

nigāh-e-mast kī allāh-re ma.asūm tākīdeñ

mujhe hai hukm sāz-e-muflisī par gungunāne kā

maiñ sāz-e-muflisī par gungunā.ūñ kis tarah 'kaifī'

hañsī bhī merī nauha hai mirā naġhma bhī mātam hai

junūñ bhī mujh se barham hai ḳhirad bhī mujh se barham hai

sulagtā shauq pighalte valvale jaltī tamannā.eñ

zamīñ merī jahannam hai falak merā jahannam hai

ḳhayālī jannatoñ meñ baiTh jā.ūñ kis tarah 'kaifī'

ye tauq-e-bandagī vo phuul sī gardan ma.āz-allāh

vo shahd-ālūd lab aur talḳhī-e-shevan ma.āz-allāh

kamāl-e-husn aur ye inkisār-e-ishq are tauba

vo nāzuk haath merā gosha-e-dāman ma.āz-allāh

jhaTak kar gosha-e-dāman chhuḌā.ūñ kis tarah 'kaifī'

naved-e-sub.h suntā hī nahīñ rañgīn ḳhvāb us kā

ghirā jaatā hai zulmat-rez kirnoñ meñ shabāb us kā

mujhe fursat nahīñ rañgīniyoñ meñ Duub jaane kī

use detā ye dhokā e'tibār-e-intiḳhāb us kā

haqīqat mast ā.ankhoñ ko dikhā.ūñ kis tarah 'kaifī'

fanā meñ huzn-dīda zindagī zam hotī jaatī hai

thakī nabzoñ kī ḳhasta zarb maddham hotī jaatī hai

ye armānoñ kā mausam ye mirī girtī huī sehhat

añdherī raat aur lau sham.a kī kam hotī jaatī hai

shabistān-e-vafā ko jagmagā.ūñ kis tarah 'kaifī'

nirālī jast karnā hai na.e raste pe chalnā hai

na.e sho.aloñ meñ tapnā hai na.e sāñche meñ Dhalnā hai

yahī do chaar sāñseñ jo abhī mujh ko sambhāle haiñ

inhīñ do chaar sāñsoñ meñ zamāne ko badalnā hai

inheñ bhī sard gītoñ meñ gañvā.ūñ kis tarah 'kaifī'

pareshāñ qāfile ne ab nishāñ manzil kā paayā hai

dhuñdlakoñ ke udhar ik surḳh taarā jhilmilāyā hai

chale haiñ hāñpte insāñ na.ī duniyā basāne ko

bahut aise haiñ in meñ jin ko ḳhud maiñ ne baḌhāyā hai

maiñ ḳhud hī rāste se lauT aa.uuñ kis tarah 'kaifī'

zaban ko tarjuman-e-gham banaun kis tarah 'kaifi'

main barg-e-gul se angare uThaun kis tarah 'kaifi'

samajh mein kis ki aae raaz mere hichkichane ka

andhere mein chala karta hai har nawak zamane ka

nigah-e-mast ki allah-re masum takiden

mujhe hai hukm saz-e-muflisi par gungunane ka

main saz-e-muflisi par gungunaun kis tarah 'kaifi'

hansi bhi meri nauha hai mera naghma bhi matam hai

junun bhi mujh se barham hai KHirad bhi mujh se barham hai

sulagta shauq pighalte walwale jalti tamannaen

zamin meri jahannam hai falak mera jahannam hai

KHayali jannaton mein baiTh jaun kis tarah 'kaifi'

ye tauq-e-bandagi wo phul si gardan maaz-allah

wo shahd-alud lab aur talKHi-e-shewan maaz-allah

kamal-e-husn aur ye inkisar-e-ishq are tauba

wo nazuk hath mera gosha-e-daman maaz-allah

jhaTak kar gosha-e-daman chhuDaun kis tarah 'kaifi'

nawed-e-subh sunta hi nahin rangin KHwab us ka

ghira jata hai zulmat-rez kirnon mein shabab us ka

mujhe fursat nahin ranginiyon mein Dub jaane ki

use deta ye dhoka e'tibar-e-intiKHab us ka

haqiqat mast aaankhon ko dikhaun kis tarah 'kaifi'

fana mein huzn-dida zindagi zam hoti jati hai

thaki nabzon ki KHasta zarb maddham hoti jati hai

ye armanon ka mausam ye meri girti hui sehhat

andheri raat aur lau shama ki kam hoti jati hai

shabistan-e-wafa ko jagmagaun kis tarah 'kaifi'

nirali jast karna hai nae raste pe chalna hai

nae shoalon mein tapna hai nae sanche mein Dhalna hai

yahi do chaar sansen jo abhi mujh ko sambhaale hain

inhin do chaar sanson mein zamane ko badalna hai

inhen bhi sard giton mein ganwaun kis tarah 'kaifi'

pareshan qafile ne ab nishan manzil ka paya hai

dhundlakon ke udhar ek surKH tara jhilmilaya hai

chale hain hanpte insan nai duniya basane ko

bahut aise hain in mein jin ko KHud main ne baDhaya hai

main KHud hi raste se lauT aaun kis tarah 'kaifi'