umr ka aaKHiri din

yahāñ mere andar daraḳhtoñ kī kitnī qatāreñ sulagtī raheñgī

vahāñ tere andar taḌapte hue lafz lamhe

parinde qatāroñ meñ baiThe hue ro rahe haiñ

daraḳhtoñ ke pīchhe ka.ī chāñd TuuTe hue reza reza

lahū meñ nahā.e hue kitne sūraj mazāroñ ke katbe!

kahīñ Dhol kī thaap par raqs-e-marg-e-musalsal

kahīñ daldaloñ meñ utarte hue jism jaise

gunahgār apne kiye kī sazā pā rahe haiñ

na tū apnī palkoñ ke kaale pharere uThā kar kahīñ jā rahī hai

na maiñ koī parcham uThā.e hue chal rahā huuñ

mire paas baiThā huā jism mujh se ye kyuuñ pūchhtā hai

kisī gul kī māhiyat-e-rañg kyā hai?

sitāroñ kā āhañg kyā hai?

ye ḳhushbū hai yā bārish-e-sañg kyā hai

ye sab zinda rahne ke hiile vasīle abas haiñ

azal se abad tak vahī silsila hai

yahāñ se vahāñ tak vahī dhund phailī huī hai

magar dhund se kaise nikleñ yahī sochte sochte mar ga.e ham

zamīñ se shajar kā janam zindagī kī alāmat magar maut bhī hai

mirī umr kā āḳhirī din

kisī bāb-e-ātish-zada par khaḌā muskurāne lagā hai

kahīñ hijr kī sā.ateñ ginte ginte mujhe niiñd aa.ī huī hai

shumār-e-sitāra ne shāyad mire dil kī rañgīñ ḳhaliyoñ meñ

kaale lahū kī ibārat likhī hai

samundar meñ Duubā huā ik makāñ jal rahā hai

yahan mere andar daraKHton ki kitni qataren sulagti rahengi

wahan tere andar taDapte hue lafz lamhe

parinde qataron mein baiThe hue ro rahe hain

daraKHton ke pichhe kai chand TuTe hue reza reza

lahu mein nahae hue kitne suraj mazaron ke katbe!

kahin Dhol ki thap par raqs-e-marg-e-musalsal

kahin daldalon mein utarte hue jism jaise

gunahgar apne kiye ki saza pa rahe hain

na tu apni palkon ke kale pharere uTha kar kahin ja rahi hai

na main koi parcham uThae hue chal raha hun

mere pas baiTha hua jism mujh se ye kyun puchhta hai

kisi gul ki mahiyat-e-rang kya hai?

sitaron ka aahang kya hai?

ye KHushbu hai ya barish-e-sang kya hai

ye sab zinda rahne ke hile wasile abas hain

azal se abad tak wahi silsila hai

yahan se wahan tak wahi dhund phaili hui hai

magar dhund se kaise niklen yahi sochte sochte mar gae hum

zamin se shajar ka janam zindagi ki alamat magar maut bhi hai

meri umr ka aaKHiri din

kisi bab-e-atish-zada par khaDa muskurane laga hai

kahin hijr ki saaten ginte ginte mujhe nind aai hui hai

shumar-e-sitara ne shayad mere dil ki rangin KHaliyon mein

kale lahu ki ibarat likhi hai

samundar mein Duba hua ek makan jal raha hai