urdu zaban

charchā har ek aan hai urdū zabān kā

girvīda kul jahān hai urdū zabān kā

is lashkarī zabān kī azmat na pochhiye

azmat to ḳhud nishān hai urdū zabān kā

gumnāmiyoñ kī dhuup meñ jaltā nahīñ kabhī

jis sar pe sā.ebān hai urdū zabān kā

mashriq kā gulsitāñ ho ki maġhrib kā āshiyāñ

vīrān kab makān hai urdū zabān kā

'saudā' va 'mīr' va 'ġhālib' va 'iqbāl' dekh lo

har ek pāsbān hai urdū zabān kā

urdū zabān meñ hai ghulī shahd kī miThās

lahja bhī mehrbān hai urdū zabān kā

tarvīj de rahā hai jo urdū zabān ko

be shak vo bāġhbān hai urdū zabān kā

mehmān kah rahā hai'' baḌā ḳhush-nasīb hai

jo shaḳhs mezbān hai urdū zabān kā

logo kahīñ bhī is meñ pas-o-pesh kuchh nahīñ

ik mo'tarif jahān hai urdū zabān kā

bolī hai rābte kī yahī joḌtī hai dil

har dil meñ aisā maan hai urdū zabān kā

vus.at-pazīr dāman-e-urdu hai aaj bhī

har gosha ik jahān hai urdū zabān kā

kartā hai ābiyārī lahū se adiib jo

vo dil hai jism-o-jān hai urdū zabān kā

aa.iiñ rukāvaTeñ jo taraqqī meñ is kī kuchh

samjho ye imtihān hai urdū zabān kā

pā.egā jald manzil-e-maqsūd bil-yaqīñ

jaarī jo kārvān hai urdū zabān kā

izzat suḳhanvarān-e-adab kī isī hai

'shā.er' bhī tarjumān hai urdū zabān kā

charcha har ek aan hai urdu zaban ka

girwida kul jahan hai urdu zaban ka

is lashkari zaban ki azmat na pochhiye

azmat to KHud nishan hai urdu zaban ka

gumnamiyon ki dhup mein jalta nahin kabhi

jis sar pe saeban hai urdu zaban ka

mashriq ka gulsitan ho ki maghrib ka aashiyan

viran kab makan hai urdu zaban ka

'sauda' wa 'mir' wa 'ghaalib' wa 'iqbaal' dekh lo

har ek pasban hai urdu zaban ka

urdu zaban mein hai ghuli shahd ki miThas

lahja bhi mehrban hai urdu zaban ka

tarwij de raha hai jo urdu zaban ko

be shak wo baghban hai urdu zaban ka

mehman kah raha hai baDa KHush-nasib hai

jo shaKHs mezban hai urdu zaban ka

logo kahin bhi is mein pas-o-pesh kuchh nahin

ek mo'tarif jahan hai urdu zaban ka

boli hai rabte ki yahi joDti hai dil

har dil mein aisa man hai urdu zaban ka

wusat-pazir daman-e-urdu hai aaj bhi

har gosha ek jahan hai urdu zaban ka

karta hai aabiyari lahu se adib jo

wo dil hai jism-o-jaan hai urdu zaban ka

aain rukawaTen jo taraqqi mein is ki kuchh

samjho ye imtihan hai urdu zaban ka

paega jald manzil-e-maqsud bil-yaqin

jari jo karwan hai urdu zaban ka

izzat suKHanwaran-e-adab ki isi hai

'shaer' bhi tarjuman hai urdu zaban ka