urus-ul-bilad

vasī.a shahr meñ ik chīḳh kyā sunā.ī de

basoñ ke shor meñ railoñ kī gaḌgaḌāhaT meñ

chahal-pahal meñ bhiḌoñ jaisī bhanbhanāhat meñ

kisī ko pakḌo sar-e-rāh maar do chāhe

kisī afīfa kī ismat utaar do chāhe!

vasī.a shahr meñ ik chīḳh kyā sunā.ī de!

aziim shahr baḌe kāmoñ ke liye haiñ miyāñ

vazīr-e-ālā kī taqrīr, leaderoñ ke julūs

siyāsatoñ ke mazāhir, ḳhulūs bahr-e-ḳhulūs

ye rat-jagoñ kī jagah, nāv-nosh kā gaḌ.h hai

ye tum se kis ne kahā ilm o hosh kā gaḌ.h hai

abhī abhī shah-e-qufqāz aa.e haiñ dekho

muazzizīn-e-urūs-ul-bilād sab mil kar

sipās-nāma unheñ is tarah kareñge pesh

ki jaise dil kī kalī phuul ho ga.ī khil kar

phir is ke ba.ad kisī bank ke baḌe kartā

koī safīr kisī desh ke na.e mukhiyā

mushīr-e-sanatī mansūba-bandiyoñ ke liye

jatan saqāfatī ā.īna-sāziyoñ ke liye

baḌe plān, baḌī yojnā, baḌī bāteñ

ziyāfateñ baḌe hotel, baḌī baḌī ghāteñ!

aziim shahr baḌe kāmoñ ke liye hai miyāñ!

yahāñ mazār haiñ un ke bhī jin ke naam nahīñ

sunahrī shahr kī tasḳhīr karne aa.e the

unheñ shikam se bahut duur aage jaanā thā

vo is jahān kī ta.amīr karne aa.e the!

baḌe dimāġh the tabba.a the zahīn the sab

magar siyāsat-e-duniyā meñ kam-tarīn the sab

aziim shahr baḌe kāmoñ ke liye haiñ miyāñ

shikast-e-dil koī roket hai jo dikhā.ī de

aziim shahr meñ ik chīḳh kyā sunā.ī de!

wasia shahr mein ek chiKH kya sunai de

bason ke shor mein railon ki gaDgaDahaT mein

chahal-pahal mein bhiDon jaisi bhanbhanahat mein

kisi ko pakDo sar-e-rah mar do chahe

kisi afifa ki ismat utar do chahe!

wasia shahr mein ek chiKH kya sunai de!

azim shahr baDe kaamon ke liye hain miyan

wazir-e-ala ki taqrir, leaderon ke julus

siyasaton ke mazahir, KHulus bahr-e-KHulus

ye rat-jagon ki jagah, naw-nosh ka gaDh hai

ye tum se kis ne kaha ilm o hosh ka gaDh hai

abhi abhi shah-e-qufqaz aae hain dekho

muazzizin-e-urus-ul-bilad sab mil kar

sipas-nama unhen is tarah karenge pesh

ki jaise dil ki kali phul ho gai khil kar

phir is ke baad kisi bank ke baDe karta

koi safir kisi desh ke nae mukhiya

mushir-e-sanati mansuba-bandiyon ke liye

jatan saqafati aaina-saziyon ke liye

baDe plan, baDi yojna, baDi baaten

ziyafaten baDe hotel, baDi baDi ghaten!

azim shahr baDe kaamon ke liye hai miyan!

yahan mazar hain un ke bhi jin ke nam nahin

sunahri shahr ki tasKHir karne aae the

unhen shikam se bahut dur aage jaana tha

wo is jahan ki tamir karne aae the!

baDe dimagh the tabba the zahin the sab

magar siyasat-e-duniya mein kam-tarin the sab

azim shahr baDe kaamon ke liye hain miyan

shikast-e-dil koi roket hai jo dikhai de

azim shahr mein ek chiKH kya sunai de!