us aangan ka chand

1

shaam samay ik ūñchī sīḌhiyoñ vaale ghar ke āñgan meñ

chāñd ko utre dekhā ham ne chāñd bhī kaisā puurā chāñd

'inshā' jī in chāhne vaalī dekhne vaalī āñkhoñ ne

mulkoñ mulkoñ shahroñ shahroñ kaisā kaisā dekhā chāñd

har ik chāñd kī apnī dhaj thī har ik chāñd kā apnā ruup

lekin aisā raushan-raushan hañstā bāteñ kartā chāñd

dard kī Tiis to uThtī thī par itnī bhī bharpūr kabhī

aaj se pahle kab utrā thā dil meñ itnā gahrā chāñd

ham ne to qismat ke Dar se jab paa.e añdhiyāre paa.e

ye bhī chāñd kā sapnā hogā kaisā chāñd kahāñ kā chāñd

2

'inshā' jī duniyā vāloñ meñ be-sāthī be-dost rahe

jaise tāroñ kī jhurmuT meñ tanhā chāñd akelā chāñd

un kā dāman is daulat se ḳhālī kā ḳhālī hī rahā

varna the duniyā meñ kitne chāñdī chāñd aur sonā chāñd

jag ke chāroñ kuuT meñ ghūmā sailānī hairāñ ho kar

is bastī ke is kūche ke is āñgan meñ aisā chāñd

āñkhoñ meñ bhī chitvan meñ bhī chāñd hī chāñd jhalakte haiñ

chāñd hī Tiikā chāñd hī jhūmar chehrā chāñd aur māthā chāñd

ek ye chāñd-nagar kā baasī jis se duur rahā sanjog

varna is duniyā meñ sab ne chāhā chāñd aur paayā chāñd

3

ambar ne dhartī par pheñkī nuur kī chhīñT udaas udaas

aaj kī shab to andhī shab thī aaj kidhar se niklā chāñd

'inshā' jī ye aur nagar hai is bastī kī riit yahī

sab kī apnī apnī āñkheñ sab kā apnā apnā chāñd

apne siine ke matla' par jo chamkā vo chāñd huā

jis ne man ke añdhiyāre meñ aan kiyā ujiyārā chāñd

chanchal muskātī muskātī gorī kā mukhḌā mahtāb

patjhaḌ ke peḌoñ meñ aTkā piilā sā ik pattā chāñd

dukh kā dariyā sukh kā sāgar is ke dam se dekh liye

ham ko apne saath hī le kar Duubā chāñd aur ubhrā chāñd

4

jhukī jhukī palkoñ ke nīche namnākī kā naam na thā

ye kāñTā jo hameñ chubhā hai kaash tujhe bhī chubhtā chāñd

raushniyoñ kī piilī kircheñ pūrab pachchhim phail ga.iiñ

tū ne kis shai ke dhoke meñ patthar par de paTkā chāñd

ham ne to donoñ ko dekhā donoñ hī be-dard kaThor

dhartī vaalā ambar vaalā pahlā chāñd aur duujā chāñd

chāñd kisī kā ho nahīñ saktā chāñd kisī kā hotā hai

chāñd kī ḳhātir zid nahīñ karte ai mire achchhe 'inshā' chāñd

1

sham samay ek unchi siDhiyon wale ghar ke aangan mein

chand ko utre dekha hum ne chand bhi kaisa pura chand

'insha' ji in chahne wali dekhne wali aankhon ne

mulkon mulkon shahron shahron kaisa kaisa dekha chand

har ek chand ki apni dhaj thi har ek chand ka apna rup

lekin aisa raushan-raushan hansta baaten karta chand

dard ki Tis to uThti thi par itni bhi bharpur kabhi

aaj se pahle kab utra tha dil mein itna gahra chand

hum ne to qismat ke Dar se jab pae andhiyare pae

ye bhi chand ka sapna hoga kaisa chand kahan ka chand

2

'insha' ji duniya walon mein be-sathi be-dost rahe

jaise taron ki jhurmuT mein tanha chand akela chand

un ka daman is daulat se KHali ka KHali hi raha

warna the duniya mein kitne chandi chand aur sona chand

jag ke chaaron kuT mein ghuma sailani hairan ho kar

is basti ke is kuche ke is aangan mein aisa chand

aankhon mein bhi chitwan mein bhi chand hi chand jhalakte hain

chand hi Tika chand hi jhumar chehra chand aur matha chand

ek ye chand-nagar ka basi jis se dur raha sanjog

warna is duniya mein sab ne chaha chand aur paya chand

3

ambar ne dharti par phenki nur ki chhinT udas udas

aaj ki shab to andhi shab thi aaj kidhar se nikla chand

'insha' ji ye aur nagar hai is basti ki rit yahi

sab ki apni apni aankhen sab ka apna apna chand

apne sine ke matla' par jo chamka wo chand hua

jis ne man ke andhiyare mein aan kiya ujiyara chand

chanchal muskati muskati gori ka mukhDa mahtab

patjhaD ke peDon mein aTka pila sa ek patta chand

dukh ka dariya sukh ka sagar is ke dam se dekh liye

hum ko apne sath hi le kar Duba chand aur ubhra chand

4

jhuki jhuki palkon ke niche namnaki ka nam na tha

ye kanTa jo hamein chubha hai kash tujhe bhi chubhta chand

raushniyon ki pili kirchen purab pachchhim phail gain

tu ne kis shai ke dhoke mein patthar par de paTka chand

hum ne to donon ko dekha donon hi be-dard kaThor

dharti wala ambar wala pahla chand aur duja chand

chand kisi ka ho nahin sakta chand kisi ka hota hai

chand ki KHatir zid nahin karte ai mere achchhe 'insha' chand