uske nam

vahī ġhunchoñ kī shādābī vahī phūloñ kī nik.hat hai

vahī sair-e-gulistāñ hai vahī josh-e-masarrat hai

vahī mauj-e-tabassum hai vahī andā-e-fitrat hai

vahī dām-e-taḳhayyul hai vahī rañg-e-haqīqat hai

vahī sub.h-o-masā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

vahī maḳhmūr rāteñ ab bhī tasvīr-e-taḳhayyul haiñ

vahī dil-chasp bāteñ ab bhī tasvīr-e-taḳhayyul haiñ

vahī pur-kaif ghāteñ ab bhī tasvīr-e-taḳhayyul haiñ

sitāroñ kī barāteñ ab bhī tasvīr-e-taḳhayyul haiñ

vahī mauj-e-sabā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

ghaTā.eñ ab bhī uThtī haiñ talātum ab bhī hotā hai

shagūfe ab bhī khilte haiñ tabassum ab bhī hotā hai

anādil ab bhī gaate haiñ tarannum ab bhī hotā hai

javānī ab bhī hañstī hai takallum ab bhī hotā hai

har ik shai ḳhush-numā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

tumhārī yaad aise meñ satātī hai mujhe ab bhī

shab-e-tanhā.ī meñ pahroñ rulātī hai mujhe ab bhī

sabā ke dosh par aa kar jagātī hai mujhe ab bhī

havās-o-hosh se be-ḳhud banātī hai mujhe ab bhī

tamannā-e-vafā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

junūñ-sāmāñ nazāroñ ke taqāze ab bhī hote haiñ

tamannā ab bhī hotī hai irāde ab bhī hote haiñ

zamāna ab bhī hañstā hai tamāshe ab bhī hote haiñ

nigāheñ ab bhī uThtī haiñ ishāre ab bhī hote haiñ

ḳhushī dil-āshnā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

rahegā yuuñ laboñ par shikva-e-jaur-e-ḳhizāñ kab tak

satā.egā bhalā nāzuk diloñ ko ye jahāñ kab tak

musalsal āzmā.ish aur paiham imtihāñ kab tak

maiñ tum se duur rah kar jī sakūñgā yuuñ yahāñ kab tak

tamannā kyā se kyā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

mujhe din raat rahtī hai tumhārī justujū ab bhī

tasavvur meñ kiyā kartā huuñ tum se guftugū ab bhī

ḳhudā shāhid hai mere dil meñ hai ye aarzū ab bhī

ki tum aa jaao chashm-e-muntazar ke rū-ba-rū ab bhī

ye ḳhvāhish bārhā hotī hai lekin tum nahīñ hotīñ

baḌī rañgīñ fazā hotī hai lekin tum nahīñ hotīñ

wahi ghunchon ki shadabi wahi phulon ki nikhat hai

wahi sair-e-gulistan hai wahi josh-e-masarrat hai

wahi mauj-e-tabassum hai wahi anda-e-fitrat hai

wahi dam-e-taKHayyul hai wahi rang-e-haqiqat hai

wahi subh-o-masa hoti hai lekin tum nahin hotin

baDi rangin faza hoti hai lekin tum nahin hotin

wahi maKHmur raaten ab bhi taswir-e-taKHayyul hain

wahi dil-chasp baaten ab bhi taswir-e-taKHayyul hain

wahi pur-kaif ghaten ab bhi taswir-e-taKHayyul hain

sitaron ki baraaten ab bhi taswir-e-taKHayyul hain

wahi mauj-e-saba hoti hai lekin tum nahin hotin

baDi rangin faza hoti hai lekin tum nahin hotin

ghaTaen ab bhi uThti hain talatum ab bhi hota hai

shagufe ab bhi khilte hain tabassum ab bhi hota hai

anadil ab bhi gate hain tarannum ab bhi hota hai

jawani ab bhi hansti hai takallum ab bhi hota hai

har ek shai KHush-numa hoti hai lekin tum nahin hotin

baDi rangin faza hoti hai lekin tum nahin hotin

tumhaari yaad aise mein satati hai mujhe ab bhi

shab-e-tanhai mein pahron rulati hai mujhe ab bhi

saba ke dosh par aa kar jagati hai mujhe ab bhi

hawas-o-hosh se be-KHud banati hai mujhe ab bhi

tamanna-e-wafa hoti hai lekin tum nahin hotin

baDi rangin faza hoti hai lekin tum nahin hotin

junun-saman nazaron ke taqaze ab bhi hote hain

tamanna ab bhi hoti hai irade ab bhi hote hain

zamana ab bhi hansta hai tamashe ab bhi hote hain

nigahen ab bhi uThti hain ishaare ab bhi hote hain

KHushi dil-ashna hoti hai lekin tum nahin hotin

baDi rangin faza hoti hai lekin tum nahin hotin

rahega yun labon par shikwa-e-jaur-e-KHizan kab tak

sataega bhala nazuk dilon ko ye jahan kab tak

musalsal aazmaish aur paiham imtihan kab tak

main tum se dur rah kar ji sakunga yun yahan kab tak

tamanna kya se kya hoti hai lekin tum nahin hotin

baDi rangin faza hoti hai lekin tum nahin hotin

mujhe din raat rahti hai tumhaari justuju ab bhi

tasawwur mein kiya karta hun tum se guftugu ab bhi

KHuda shahid hai mere dil mein hai ye aarzu ab bhi

ki tum aa jao chashm-e-muntazar ke ru-ba-ru ab bhi

ye KHwahish barha hoti hai lekin tum nahin hotin

baDi rangin faza hoti hai lekin tum nahin hotin