us roz tum kahan the

jis roz dhuup niklī

aur log apne apne

ThanDe gharoñ se bāhar

hāthoñ meñ Daale

sūraj kī samt nikle

us roz tum kahāñ the

jis roz dhuup niklī

aur phuul bhī khule the

the sabz baaġh raushan

ashjār ḳhush hue the

pattoñ kī sabz ḳhushbū

jab sab gharoñ meñ aa.ī

us roz tum kahāñ the

jis roz āsmāñ par

manzar chamak rahe the

sūraj kī sīḌhiyoñ par

uḌte the Dheroñ panchhī

aur saaf ghāTiyoñ par

kuchh phuul bhī khule the

us roz tum kahāñ the

jis roz dhuup chamkī

aur fāḳhta tumhāre

ghar kī chhatoñ pe bolī

phir mandiroñ meñ aa.iiñ

ḳhushbū bharī havā.eñ

aur nanhe-munne bachche

tab āñganoñ meñ khele

us roz tum kahāñ the

jis roz dhuup niklī

jis roz dhuup niklī

aur alganī pe Daale

kuchh sūkhne ko kapḌe

jab apne ghar kī chhat pe

ḳhāmosh maiñ khaḌā thā

tanhā udaas beleñ

aur dopahar ke panchhī

kuchh mujh se pūchhte the

us roz tum kahāñ the

jis roz dhup nikli

aur log apne apne

ThanDe gharon se bahar

hathon mein Dale

suraj ki samt nikle

us roz tum kahan the

jis roz dhup nikli

aur phul bhi khule the

the sabz bagh raushan

ashjar KHush hue the

patton ki sabz KHushbu

jab sab gharon mein aai

us roz tum kahan the

jis roz aasman par

manzar chamak rahe the

suraj ki siDhiyon par

uDte the Dheron panchhi

aur saf ghaTiyon par

kuchh phul bhi khule the

us roz tum kahan the

jis roz dhup chamki

aur faKHta tumhaare

ghar ki chhaton pe boli

phir mandiron mein aain

KHushbu bhari hawaen

aur nanhe-munne bachche

tab aanganon mein khele

us roz tum kahan the

jis roz dhup nikli

jis roz dhup nikli

aur algani pe Dale

kuchh sukhne ko kapDe

jab apne ghar ki chhat pe

KHamosh main khaDa tha

tanha udas belen

aur dopahar ke panchhi

kuchh mujh se puchhte the

us roz tum kahan the