usi aag mein

usī aag meñ

mujhe jhoñk do

vahī aag jis ne bulāyā thā

mujhe ek din dam-e-sho.alagī

dam-e-sho.alagī mirā intizār kiyā bahut

ka.ī ḳhushk lakḌiyoñ shāḳhchoñ, ke hisār meñ

jahāñ barg-o-bār kā Dher thā

dam-e-sho.alagī

mujhe ek patte ne ye kahā thā ghamanD se

idhar aa ke dekh

ki is tapīda ḳhumār meñ

hamīñ ham haiñ

lakḌiyoñ shāḳhchoñ ke hisār meñ

yahāñ aur kaun vajūd hai

yahāñ sirf ham haiñ ruke hue

kahīñ aadhe aur

kahīñ puure puure jale hue

dam-e-sho.alagī

hameñ jo masarrat-e-raqs thī

tumheñ kyā ḳhabar

agar aag tum ko aziiz thī

to ye jism kaun sī chiiz thī

jise tum kabhī na jalā sake

vo jo raaz thā pas-e-sho.alagī nahīñ pā sake!

so kahā thā maiñ ne ye ek adh-jale barg se

mujhe dukh bahut hai ki aag ne

mirā intizār kiyā bahut

magar un dinoñ

kisī aur tarz kī aag meñ

mirā jism jalne kī aarzū meñ asiir thā

magar un dinoñ maiñ na jal sakā

maiñ na juun apnī badal sakā

magar ab vo aag

ki jis meñ tum ne panāh lī

jahāñ tum jale

jahāñ tum ajiib sī lazzatoñ se gale mile

usī aag meñ mujhe jhoñk do

usi aag mein

mujhe jhonk do

wahi aag jis ne bulaya tha

mujhe ek din dam-e-shoalagi

dam-e-shoalagi mera intizar kiya bahut

kai KHushk lakDiyon shaKHchon, ke hisar mein

jahan barg-o-bar ka Dher tha

dam-e-shoalagi

mujhe ek patte ne ye kaha tha ghamanD se

idhar aa ke dekh

ki is tapida KHumar mein

hamin hum hain

lakDiyon shaKHchon ke hisar mein

yahan aur kaun wajud hai

yahan sirf hum hain ruke hue

kahin aadhe aur

kahin pure pure jale hue

dam-e-shoalagi

hamein jo masarrat-e-raqs thi

tumhein kya KHabar

agar aag tum ko aziz thi

to ye jism kaun si chiz thi

jise tum kabhi na jala sake

wo jo raaz tha pas-e-shoalagi nahin pa sake!

so kaha tha main ne ye ek adh-jale barg se

mujhe dukh bahut hai ki aag ne

mera intizar kiya bahut

magar un dinon

kisi aur tarz ki aag mein

mera jism jalne ki aarzu mein asir tha

magar un dinon main na jal saka

main na jun apni badal saka

magar ab wo aag

ki jis mein tum ne panah li

jahan tum jale

jahan tum ajib si lazzaton se gale mile

usi aag mein mujhe jhonk do