usi ke liye

maiñ ne dekhī nahīñ

ḳhvāb buntī huī uñgliyāñ

jin kā lams-e-gudāz

vaqt ke sard gāloñ se bahtā huā

mere hoñToñ pe aayā

to sadiyoñ kī namkīniyāñ sañg-basta diloñ ke samundar meñ

ubhre pahāḌoñ kā ik silsila ban chukī thiiñ

vo kyā silsila thā

jo ik god se gor tak reshmī taar sā tan gayā

jis pe chalte zamāne

ḳhudāvand-e-ālā ke ahkām-e-rahmat uThā.e hue raqs karte guzarte

to miTTī pe naqsh-o-nigārān-e-ġham muskurāte

tujhe yaad aate tujhe yaad karte hue

yuuñ guzarte

ki jaise kisī bhed-bhāo bharī chāñdnī-rāt se

chāñd kā bāñkpan

bādaloñ ke laḌakpan ke gaale uḌāte hue

ḳhvāb-labrez pariyoñ se chhup chhup ke guzre

ye dikhne dikhāne kī saarī mashiyyat

ye chhupne chhupāne kī saarī aziyyat

koī jheltā hai

jo tū ne akele meñ jhelī

maiñ kitne dinoñ ba.ad aayā tire paañv chhūne

hisābāt computer se nikal kar

kise DhūñDne jā chuke haiñ

baḌī se baḌī baat ko

ek bhīgī huī muskurāhaT meñ kahne kā tujh ko salīqa thā

ādād o alfāz kī bhiiḌ meñ

kis qadar maiñ akelā huuñ

tujh ko ḳhabar hai

atā kar mujhe bhī

koī aisā achchhā hunar

phuul hoñToñ ke

murda zamāne pe rakkhūñ to

ḳhushbū tirī

gul-badan ban ke jaage

tire saañs meñ saañs lene kī rāhat

mirī yaad ke baaġh meñ

ek jādū-zada nīm-ḳhvābīda shahzādi-e-zindagī kī tarah muntazir hai

yahāñ apne hone se kis ko mafar hai

koī niiñd meñ jāgne kī aziyyat nahīñ jāntā

apnī jannat kā manzar mire malgaje ḳhvāb par khol de

koī shīrīñ-takallum mire zahr meñ ghol de

fāsla niiñd aur maut ke darmiyāñ

apnī maujūdgī se banā

kar atā mojazātī hunar

maiñ to noToñ kī gintī meñ uljhe zamāne kī

vo mail huuñ

jis pe makkhī bhī aa kar nahīñ baiThtī

main ne dekhi nahin

KHwab bunti hui ungliyan

jin ka lams-e-gudaz

waqt ke sard galon se bahta hua

mere honTon pe aaya

to sadiyon ki namkiniyan sang-basta dilon ke samundar mein

ubhre pahaDon ka ek silsila ban chuki thin

wo kya silsila tha

jo ek god se gor tak reshmi tar sa tan gaya

jis pe chalte zamane

KHudawand-e-ala ke ahkaam-e-rahmat uThae hue raqs karte guzarte

to miTTi pe naqsh-o-nigaran-e-gham muskuraate

tujhe yaad aate tujhe yaad karte hue

yun guzarte

ki jaise kisi bhed-bhao bhari chandni-raat se

chand ka bankpan

baadalon ke laDakpan ke gale uDate hue

KHwab-labrez pariyon se chhup chhup ke guzre

ye dikhne dikhane ki sari mashiyyat

ye chhupne chhupane ki sari aziyyat

koi jhelta hai

jo tu ne akele mein jheli

main kitne dinon baad aaya tere panw chhune

hisabaat computer se nikal kar

kise DhunDne ja chuke hain

baDi se baDi baat ko

ek bhigi hui muskurahaT mein kahne ka tujh ko saliqa tha

aadad o alfaz ki bhiD mein

kis qadar main akela hun

tujh ko KHabar hai

ata kar mujhe bhi

koi aisa achchha hunar

phul honTon ke

murda zamane pe rakkhun to

KHushbu teri

gul-badan ban ke jage

tere sans mein sans lene ki rahat

meri yaad ke bagh mein

ek jadu-zada nim-KHwabida shahzadi-e-zindagi ki tarah muntazir hai

yahan apne hone se kis ko mafar hai

koi nind mein jagne ki aziyyat nahin jaanta

apni jannat ka manzar mere malgaje KHwab par khol de

koi shirin-takallum mere zahr mein ghol de

fasla nind aur maut ke darmiyan

apni maujudgi se bana

kar ata mojazati hunar

main to noTon ki ginti mein uljhe zamane ki

wo mail hun

jis pe makkhi bhi aa kar nahin baiThti