uT-paTang

kānoñ kī ik nagrī dekhī jis meñ saare kaane dekhe

ek taraf se ahmaq saare ek taraf se siyāne the

kānoñ kī is nagrī ke sab riit rivāj alāhada the

rog alāhada bastī meñ the aur ilaaj alāhada the

do do kaane mil kar puurā sapnā dekhā karte the

gañgā ke sañgam se kaane jamunā dekhā karte the

chāñdnī raat meñ chhatrī le kar bāhar jaayā karte the

os gire to kahte haiñ vaañ sar phaT jaayā karte the

dariyā pul par chaltā thā paanī meñ raileñ chaltī thiiñ

lañgūroñ kī dum par añgūroñ kī beleñ paktī thiiñ

chhūt kī ik bīmārī phailī ek dafa un kānoñ meñ

bhuuk ke kiiḌe sunte haiñ nikle gandum ke dānoñ meñ

roz ka.ī kaane bechāre marte the bīmārī meñ

kahte haiñ raajā sotā thā sone kī almārī meñ

ghanTī bāñdh ke chūhe jab billī se dauḌ lagāte the

peT pe donoñ haath bajā kar sab qavvālī gaate the

tab kaanī bhaiñs ne phuul phulā kar chheḌā biin kā baajā

aur kaalā chashma pahan ke singhāsan par aayā raajā

dukh se chashme kī donoñ hī āñḳheñ paanī paanī thiiñ

dekhā us kaane raajā kī donoñ āñḳheñ kaanī thiiñ

jhūTā hai jo andhoñ meñ kaanā raajā hai kahtā hai

jā kar dekho kaanī nagrī andhā raajā rahtā hai

kanon ki ek nagri dekhi jis mein sare kane dekhe

ek taraf se ahmaq sare ek taraf se siyane the

kanon ki is nagri ke sab rit riwaj alahada the

rog alahada basti mein the aur ilaj alahada the

do do kane mil kar pura sapna dekha karte the

ganga ke sangam se kane jamuna dekha karte the

chandni raat mein chhatri le kar bahar jaya karte the

os gire to kahte hain wan sar phaT jaya karte the

dariya pul par chalta tha pani mein railen chalti thin

languron ki dum par anguron ki belen pakti thin

chhut ki ek bimari phaili ek dafa un kanon mein

bhuk ke kiDe sunte hain nikle gandum ke danon mein

roz kai kane bechaare marte the bimari mein

kahte hain raja sota tha sone ki almari mein

ghanTi bandh ke chuhe jab billi se dauD lagate the

peT pe donon hath baja kar sab qawwali gate the

tab kani bhains ne phul phula kar chheDa bin ka baja

aur kala chashma pahan ke singhasan par aaya raja

dukh se chashme ki donon hi aanKHen pani pani thin

dekha us kane raja ki donon aanKHen kani thin

jhuTa hai jo andhon mein kana raja hai kahta hai

ja kar dekho kani nagri andha raja rahta hai