wadi-e-pinhan

vaqt ke dariyā meñ uTThī thī abhī pahlī hī lahr

chand insānoñ ne lī ik vādi-e-pinhāñ kī raah

mil ga.ī un ko vahāñ

āġhosh-e-rāhat meñ panāh

kar liyā ta.amīr ik mausīqī o ishrat kā shahr

mashriq-o-maġhrib ke paar

zindagī aur maut kī farsūda shah-rāhoñ se duur

jis jagah se āsmāñ kā qāfila letā hai nuur

jis jagah har sub.h ko miltā hai īma-e-zuhūr

aur bune jaate haiñ rātoñ ke liye ḳhvāb ke jaal

sīkhtī hai jis jagah parvāz huur

aur farishtoñ ko jahāñ maltā hai āhañg-e-surūr

ġham-nasīb ahrīmanoñ ko girya-e-āh-o-fuġhāñ

kaash batlā de koī

mujh ko bhī is vādi-e-pinhāñ kī raah

mujh ko ab tak justujū hai

zindagī ke taaza jaulāñ-gāh kī

kaisī be-zārī sī hai

zindagī ke kohna āhañg-e-musalsal se mujhe

sar-zamīn-e-zīst kī afsurda mahfil se mujhe

dekh le ik baar kaash

us jahāñ kā manzar-e-rañgīñ nigāh

jis jagah hai qahqahoñ kā ik daraḳhshanda vafūr

jis jagah se āsmāñ kā qāfila letā hai nuur

jis kī rif.at dekh kar ḳhud himmat-e-yazdāñ hai chuur

jis jagah hai vaqt ik taaza surūr

jis jagah ahrīmanoñ kā bhī nahīñ kuchh iḳhtiyār

mashriq-o-maġhrib ke paar

waqt ke dariya mein uTThi thi abhi pahli hi lahr

chand insanon ne li ek wadi-e-pinhan ki rah

mil gai un ko wahan

aaghosh-e-rahat mein panah

kar liya tamir ek mausiqi o ishrat ka shahr

mashriq-o-maghrib ke par

zindagi aur maut ki farsuda shah-rahon se dur

jis jagah se aasman ka qafila leta hai nur

jis jagah har subh ko milta hai ima-e-zuhur

aur bune jate hain raaton ke liye KHwab ke jal

sikhti hai jis jagah parwaz hur

aur farishton ko jahan malta hai aahang-e-surur

gham-nasib ahrimanon ko girya-e-ah-o-fughan

kash batla de koi

mujh ko bhi is wadi-e-pinhan ki rah

mujh ko ab tak justuju hai

zindagi ke taza jaulan-gah ki

kaisi be-zari si hai

zindagi ke kohna aahang-e-musalsal se mujhe

sar-zamin-e-zist ki afsurda mahfil se mujhe

dekh le ek bar kash

us jahan ka manzar-e-rangin nigah

jis jagah hai qahqahon ka ek daraKHshanda wafur

jis jagah se aasman ka qafila leta hai nur

jis ki rifat dekh kar KHud himmat-e-yazdan hai chur

jis jagah hai waqt ek taza surur

jis jagah ahrimanon ka bhi nahin kuchh iKHtiyar

mashriq-o-maghrib ke par