وادئ گل

دید ہی دید ہے اے عمر رواں کچھ بھی نہیں

یہ جہاں کتنا حسیں ہے یہ جہاں کچھ بھی نہیں

یہ تبسم یہ تکلم یہ تماشا یہ نگہ

یوں تو سب کچھ ہے یہاں اور یہاں کچھ بھی نہیں

تیرے ابرو سے سوا وہ نگہ‌ تشنۂ خوں

تیر جب نکلا کماں سے تو کماں کچھ بھی نہیں

عمر کے فاصلے طے کر نہ سکا جذبۂ شوق

خون دل کچھ بھی نہیں قلب تپاں کچھ بھی نہیں

ڈھونڈیئے چل کے کہیں عمر گزشتہ کا سراغ

کشتئ دل کے لئے سیل زماں کچھ بھی نہیں

ان نظاروں میں نظر اپنی بھی جانب مسعودؔ

وادئ گل میں بجز دل کا زیاں کچھ بھی نہیں