wapsi ka safar

merī talāsh mujhe le chalī hai maazī meñ

tumhīñ batāo maiñ ḳhud ko kahāñ talāsh karūñ

pighal pighal ke sadā imtihāñ kī ātish meñ

vajūd Dhal gayā merā ajiib sāñchoñ meñ

vo ik vajūd jo rishtoñ meñ kho gayā hai kahīñ

usī vajūd ko phir se kahāñ talāsh karūñ

tarāshnā hai nayā ik mujassama yā phir

maiñ apne gum-shuda hissoñ ko phir talāsh karūñ

tumhīñ batāo maiñ ḳhud ko kahāñ talāsh karūñ

savāl ye hai ki tum se hī kyoñ muḳhātib huuñ

chalo batā.ūñ tumheñ kam se kyoñ savāl kiyā

tumhīñ pe aa ke rukā thā mohabbatoñ kā safar

tumhīñ ho āḳhirī pahchān mere hone kī

to kyoñ na tum se shurūa ho ye vāpsī kā safar

tumhāre pyaar ke badle jo pyaar tum ko diyā

merī vafāoñ ne jo iḳhtiyār tum ko diyā

vo iḳhtiyār jo tum ne qafas meñ Dhaal diyā

usī qafas se rihā.ī hai ibtidā merī

tumhāre naam kiyā thā jo umr kā hissa

ye iltijā hai mirī aaj mujh ko lauTā do

baḌā kaThin hai merī jaañ ye vāpsī kā safar

rihā.ī de ke mujhe aaj mujh se milvā do

meri talash mujhe le chali hai mazi mein

tumhin batao main KHud ko kahan talash karun

pighal pighal ke sada imtihan ki aatish mein

wajud Dhal gaya mera ajib sanchon mein

wo ek wajud jo rishton mein kho gaya hai kahin

usi wajud ko phir se kahan talash karun

tarashna hai naya ek mujassama ya phir

main apne gum-shuda hisson ko phir talash karun

tumhin batao main KHud ko kahan talash karun

sawal ye hai ki tum se hi kyon muKHatib hun

chalo bataun tumhein kam se kyon sawal kiya

tumhin pe aa ke ruka tha mohabbaton ka safar

tumhin ho aaKHiri pahchan mere hone ki

to kyon na tum se shurua ho ye wapsi ka safar

tumhaare pyar ke badle jo pyar tum ko diya

meri wafaon ne jo iKHtiyar tum ko diya

wo iKHtiyar jo tum ne qafas mein Dhaal diya

usi qafas se rihai hai ibtida meri

tumhaare nam kiya tha jo umr ka hissa

ye iltija hai meri aaj mujh ko lauTa do

baDa kaThin hai meri jaan ye wapsi ka safar

rihai de ke mujhe aaj mujh se milwa do