wapsi

kabhī to aaogī lauT kar tum

aa ke dekhogī rāhguzar ko

ik shikasta sā ghar milegā

jis kī chaukhaT se baam tak ik

zard pattoñ kī bel hogī

jo sunā.egī dāstāneñ

akele-pan kī udāsiyoñ par

haath uThegā dastakoñ ko

dar to lekin khulā milegā

jaise tum ko sadā milā thā

ghar ke āñgan meñ dekhnā tum

kitnī vahshat bharī paḌī hai

sāmne ik ghaḌī hai dekho

jis pe do baj ke das minute haiñ

tere jaate hī ek pal meñ

vo saare lamhe Thahar ga.e the

jo ki ab tak ruke hue haiñ

yaad hogā na merā kamra

dīvāreñ jis kī bharī huiiñ haiñ

ab bhī terī hī tasvīroñ se

jis kī sākin fazā meñ ab tak

tumhārī ḳhushbū basī huī hai

vahāñ ik za.iif sī mez hogī

jis pe rakhe bosīda kāġhaz

un pe likhī adhūrī nazmeñ

vo adh-miTe se hurūf saare

batā.eñge tum ko kis tarah se

adhūre-pan ke azaab jhele

kitne sūkhe gulāb jin par

tumhārī har ik sālgirah kā

din bhī likhā tārīḳh bhī hai

ikaTThe saare gulāb karnā

phir un kā gin ke hisāb karnā

kitne sāloñ se tum na aa.ī

chhalak ke aañsū gireñge un par

uThā ke saare bosīda kāġhaz

lagā ke dil se gulāb saare

lapak ke bhāgogī phir galī meñ

vahāñ pe bachche jo khelte haiñ

tum un se pūchhogī jā ke merā

yahāñ pe bastā thā ek shā.ir

yahāñ pe rahtā thā ek saa.im

kahāñ hai vo ab kidhar gayā hai

bachche hairat se tujh ko dekheñge

tum ho vo

tum ho vo

jis se ulfat nibhā nibhā kar

vo jis ke qisse sunā sunā kar

vafā ko kar ke amar gayā vo

tum ne aane meñ der kar dī

vo terā shā.ir vo terā saa.im

barsoñ pahle hī mar gayā vo

tum ne aane meñ der kar dī

kabhi to aaogi lauT kar tum

aa ke dekhogi rahguzar ko

ek shikasta sa ghar milega

jis ki chaukhaT se baam tak ek

zard patton ki bel hogi

jo sunaegi dastanen

akele-pan ki udasiyon par

hath uThega dastakon ko

dar to lekin khula milega

jaise tum ko sada mila tha

ghar ke aangan mein dekhna tum

kitni wahshat bhari paDi hai

samne ek ghaDi hai dekho

jis pe do baj ke das minute hain

tere jate hi ek pal mein

wo sare lamhe Thahar gae the

jo ki ab tak ruke hue hain

yaad hoga na mera kamra

diwaren jis ki bhari huin hain

ab bhi teri hi taswiron se

jis ki sakin faza mein ab tak

tumhaari KHushbu basi hui hai

wahan ek zaif si mez hogi

jis pe rakhe bosida kaghaz

un pe likhi adhuri nazmen

wo adh-miTe se huruf sare

bataenge tum ko kis tarah se

adhure-pan ke azab jhele

kitne sukhe gulab jin par

tumhaari har ek salgirah ka

din bhi likha tariKH bhi hai

ikaTThe sare gulab karna

phir un ka gin ke hisab karna

kitne salon se tum na aai

chhalak ke aansu girenge un par

uTha ke sare bosida kaghaz

laga ke dil se gulab sare

lapak ke bhagogi phir gali mein

wahan pe bachche jo khelte hain

tum un se puchhogi ja ke mera

yahan pe basta tha ek shair

yahan pe rahta tha ek saim

kahan hai wo ab kidhar gaya hai

bachche hairat se tujh ko dekhenge

tum ho wo

tum ho wo

jis se ulfat nibha nibha kar

wo jis ke qisse suna suna kar

wafa ko kar ke amar gaya wo

tum ne aane mein der kar di

wo tera shair wo tera saim

barson pahle hi mar gaya wo

tum ne aane mein der kar di