wasoKHt

sach hai hamīñ ko aap ke shikve bajā na the

be-shak sitam janāb ke sab dostāna the

haañ jo jafā bhī aap ne kī qā.ede se kī

haañ ham hī kārband-e-usūl-e-vafā na the

aa.e to yuuñ ki jaise hamesha the mehrbāñ

bhūle to yuuñ ki jaise kabhī āshnā na the

kyuuñ dād-e-ġham hamīñ ne talab kī burā kiyā

ham se jahāñ meñ kushta-e-ġham aur kyā na the

gar fikr-e-zaḳhm kī to ḳhatā-vār haiñ ki ham

kyuuñ mahv-e-mad.h-e-ḳhūbi-e-teġh-e-adā na the

har chārāgar ko chāragarī se gurez thā

varna hameñ jo dukh the bahut lā-davā na the

lab par hai talḳhi-e-mai-e-ayyām varna 'faiz'

ham talḳhi-e-kalām pe maa.il zarā na the

sach hai hamin ko aap ke shikwe baja na the

be-shak sitam janab ke sab dostana the

han jo jafa bhi aap ne ki qaede se ki

han hum hi karband-e-usul-e-wafa na the

aae to yun ki jaise hamesha the mehrban

bhule to yun ki jaise kabhi aashna na the

kyun dad-e-gham hamin ne talab ki bura kiya

hum se jahan mein kushta-e-gham aur kya na the

gar fikr-e-zaKHm ki to KHata-war hain ki hum

kyun mahw-e-madh-e-KHubi-e-tegh-e-ada na the

har chaaragar ko chaaragari se gurez tha

warna hamein jo dukh the bahut la-dawa na the

lab par hai talKHi-e-mai-e-ayyam warna 'faiz'

hum talKHi-e-kalam pe mail zara na the