waba ke dinon mein maut ki rehearsal

tanhā.ī ke juute pahne

ham second-hand qabroñ meñ rah rahe haiñ

hameñ akele-pan kī mashīnoñ meñ Daal kar

sikhāyā jā rahā hai

ki maut se jañg ho jaa.e to

kamar par golī khā kar maidān se bhāgnā nahīñ hai

hamāre siine parcham kī tarah

lahrā rahe haiñ

barsāt kā mausam nahīñ

magar maut puurī shiddatoñ ke saath

tamām shahroñ par baras rahī hai

ham apnī apnī qabroñ meñ paḌe sochte haiñ

zindagī kī riyāzī meñ

faqat nafī kī mashqeñ kyoñ hotī haiñ

hamārī āñkheñ din bhar dīvāroñ par

sirf janāza-gāheñ painT kartī rahtī haiñ

agarche hamāre saath

kisī kī āñkheñ nahīñ jā.eñgī

na koī muskurāhaT

na alvidā'ī bosa

koī curfew jaisī maut bhī martā hai

aaj se pahle ye savāl

kahīñ paidā nahīñ huā thā

ham sirf apnī āñkhoñ se zinda rah kar

apne aap ko bātoñ meñ lagā.e hue haiñ

jaane kab ye rābta munqata.a ho

aur ham second-hand qabroñ se

plastic ke thailoñ meñ muntaqil ho jaa.eñ

tanhai ke jute pahne

hum second-hand qabron mein rah rahe hain

hamein akele-pan ki mashinon mein Dal kar

sikhaya ja raha hai

ki maut se jang ho jae to

kamar par goli kha kar maidan se bhagna nahin hai

hamare sine parcham ki tarah

lahra rahe hain

barsat ka mausam nahin

magar maut puri shiddaton ke sath

tamam shahron par baras rahi hai

hum apni apni qabron mein paDe sochte hain

zindagi ki riyazi mein

faqat nafi ki mashqen kyon hoti hain

hamari aankhen din bhar diwaron par

sirf janaza-gahen painT karti rahti hain

agarche hamare sath

kisi ki aankhen nahin jaengi

na koi muskurahaT

na alwida'i bosa

koi curfew jaisi maut bhi marta hai

aaj se pahle ye sawal

kahin paida nahin hua tha

hum sirf apni aankhon se zinda rah kar

apne aap ko baaton mein lagae hue hain

jaane kab ye rabta munqata ho

aur hum second-hand qabron se

plastic ke thailon mein muntaqil ho jaen