wahi kashf-e-zat ki aarzu

mirā dil giro mirī jaañ giro

chalā aa ki hai mirā dar khulā

tū mirā nasīb hai rāh-rau

ye havā ye barq ye ra.ad-o-abr ye tīrgī

rah-e-intizār kī nārasī

mire jān-o-dil pe haiñ lau buto

mire mehmāñ mire rāh-rau

ai gurez-pā tū sarāb-e-dasht ḳhalā na ban

vo navā na ban jo fareb-e-rāh-guzār ho

vo fusūn-e-arz-o-samā na ban

jise dil-giraftoñ se aar ho

jo tujhe bulātī hai pai-ba-pai

vo sadā jilājal-e-jāñ kī hai

vo sadā murūr-e-zamāñ kī hai

kise us sadā se farār ho

mirā dil giro mirī jaañ giro

tirī kun-ma-kun tirī rau-ma-rau

mujhe bār-e-jāñ

ki maiñ harf jis kā bayāñ hai tū

maiñ vo jism jis kī ravāñ hai tū

tū kalām hai maiñ tirī zabāñ

tū vo sham.a hai ki maiñ jis kī lau

kisī naqsh-e-kār kā ik nafas

ka.ī sūrateñ jo sadā se tishna-e-rañg thiiñ

huiiñ vasl-e-ma.anī se bārvar

kisī but-tarāsh kī ik nigah

ka.ī sañg-e-aziyat-e-yās-o-marg

se bach ga.e

hue samt-e-rāh se bā-ḳhabar

chalā aa ki merī nidā meñ bhī

vahī rūyat-e-azalī ki hai

jise yaad ġhāyat-e-rañg-o-bū

jise yaad rāz-e-mai-o-subū

jise yaad vāda-e-tār-o-pū

chalā aa ki merī nidā meñ bhī

isī kashf-e-zāt kī aarzū

mera dil giro meri jaan giro

chala aa ki hai mera dar khula

tu mera nasib hai rah-rau

ye hawa ye barq ye rad-o-abr ye tirgi

rah-e-intizar ki narasi

mere jaan-o-dil pe hain lau buto

mere mehman mere rah-rau

ai gurez-pa tu sarab-e-dasht KHala na ban

wo nawa na ban jo fareb-e-rah-guzar ho

wo fusun-e-arz-o-sama na ban

jise dil-girafton se aar ho

jo tujhe bulati hai pai-ba-pai

wo sada jilajal-e-jaan ki hai

wo sada murur-e-zaman ki hai

kise us sada se farar ho

mera dil giro meri jaan giro

teri kun-ma-kun teri rau-ma-rau

mujhe bar-e-jaan

ki main harf jis ka bayan hai tu

main wo jism jis ki rawan hai tu

tu kalam hai main teri zaban

tu wo shama hai ki main jis ki lau

kisi naqsh-e-kar ka ek nafas

kai suraten jo sada se tishna-e-rang thin

huin wasl-e-mani se barwar

kisi but-tarash ki ek nigah

kai sang-e-aziyat-e-yas-o-marg

se bach gae

hue samt-e-rah se ba-KHabar

chala aa ki meri nida mein bhi

wahi ruyat-e-azali ki hai

jise yaad ghayat-e-rang-o-bu

jise yaad raaz-e-mai-o-subu

jise yaad wada-e-tar-o-pu

chala aa ki meri nida mein bhi

isi kashf-e-zat ki aarzu