wahi laDki

bhūrī āñkhoñ vaalī laḌkī

tujh se pahle mere paas bhī aatī thī

apne ghar kī ik ik baat sunātī thī

mehñdī aur vismay se aarī kaale bāloñ vaalī ammī

jalte charāġhoñ jaise āñkhoñ vaalī bahnoñ

un ke sañgtaroñ kī phāñkoñ jaise hoñToñ

duudh ke pyāloñ jaise ujle gāloñ

raushan jismoñ

sarv-qadoñ ke qisse sunāyā kartī thī

mere ghar meñ vo ḳhurshīd kī sūrat roz ubhartī thī

mujh se merī nazmeñ giit aur ġhazleñ suntī rahtī thī

sweater buntī rahtī thī

akasr merī ġhazleñ gā kar mujhe sunāyā kartī thī

chhāyā kī rasiyā thī vo aur chhāyā rachāyā kartī thī

Tuk Tuk dekhā kartī thī

ThanDī aa.heñ bhartī thī

aisā zāhir kartī thī

jaise mujh par martī thī

lāñbī palkoñ vaalī laḌkī

mujh se pahle ek sitār-navāz ke paas bhī jaatī thī

us ke rasīle naġhmoñ par nāgan kī tarah lahrātī thī

us kī tānoñ aur palToñ par dhuāñ dhuāñ ho jaatī thī

meñDh jidhar le jaatī thī us samt ravāñ ho jaatī thī

giit ke lai baḌhte hī tund bagūla ban jaatī thī

takte takte goyā ek hayūlā sā ban jaatī thī

sampar dāyāñ paañv zamīñ par maar ke vo ruk jaatī thī

ruk kar yuuñ lahrā kar girtī

jaise koī kāñch kā pyāla

haath se chhūTe

chhan se TuuTe

gir kar uThtī

uTh kar yuuñ jhuk jaatī thī

jaise koī ban-bāsī devī

karmoñ kā phal bhog chukī ho

devtā ke charnoñ meñ jhukī ho

mastī meñ Dag bharne vaalī

sambhal sambhal pag bhartī thī

ThanDī aa.heñ bhartī thī

aisā zāhir kartī thī

jaise us par martī thī

takte hī takte vo ek hayūlā sā ban jaatī thī

us ke rasīle naġhmoñ par nāgin kī tarah lahrātī thī

lambī choTī vaalī laḌkī sab ko dhokā detī hai

mausīqī kī rasiyā mausīqāroñ ko Das letī hai

bhuri aankhon wali laDki

tujh se pahle mere pas bhi aati thi

apne ghar ki ek ek baat sunati thi

mehndi aur wismay se aari kale baalon wali ammi

jalte charaghon jaise aankhon wali bahnon

un ke sangtaron ki phankon jaise honTon

dudh ke pyalon jaise ujle galon

raushan jismon

sarw-qadon ke qisse sunaya karti thi

mere ghar mein wo KHurshid ki surat roz ubharti thi

mujh se meri nazmen git aur ghazlen sunti rahti thi

sweater bunti rahti thi

akasr meri ghazlen ga kar mujhe sunaya karti thi

chhaya ki rasiya thi wo aur chhaya rachaya karti thi

Tuk Tuk dekha karti thi

ThanDi aahen bharti thi

aisa zahir karti thi

jaise mujh par marti thi

lanbi palkon wali laDki

mujh se pahle ek sitar-nawaz ke pas bhi jati thi

us ke rasile naghmon par nagan ki tarah lahraati thi

us ki tanon aur palTon par dhuan dhuan ho jati thi

meinDh jidhar le jati thi us samt rawan ho jati thi

git ke lai baDhte hi tund bagula ban jati thi

takte takte goya ek hayula sa ban jati thi

sampar dayan panw zamin par mar ke wo ruk jati thi

ruk kar yun lahra kar girti

jaise koi kanch ka pyala

hath se chhuTe

chhan se TuTe

gir kar uThti

uTh kar yun jhuk jati thi

jaise koi ban-basi dewi

karmon ka phal bhog chuki ho

dewta ke charnon mein jhuki ho

masti mein Dag bharne wali

sambhal sambhal pag bharti thi

ThanDi aahen bharti thi

aisa zahir karti thi

jaise us par marti thi

takte hi takte wo ek hayula sa ban jati thi

us ke rasile naghmon par nagin ki tarah lahraati thi

lambi choTi wali laDki sab ko dhoka deti hai

mausiqi ki rasiya mausiqaron ko Das leti hai