wahi main hun wahi meri kahani hai

vahī qissa mire dil kā

dil-e-vahshat-zada par bādaloñ kī tarah us umḌe hue be-nām mausam kā

ki jo be-nām to thā hī ka.ī barsoñ se be-ma.anī bhī ho kar rah gayā hai

aur ye maiñ ne is liye likkhā hai

kyuuñ ki maiñ ne is ke ma.anī

be-had ma.azarat ke saath

ab tak

computer ke zamāne ke kisī zarḳhez-tar dil ke luġhat meñ bhī nahīñ dekhe

mire jazboñ ke shāḳh-o-barg par

be-shirkat-e-ġhair yahī mausam hai jis kī hukmarānī hai

vahī maiñ huuñ vahī chāroñ taraf raqsāñ mirī afsurda shab hai

aur vahī merī thakī haarī huī jaagī huī roī huī āñkhoñ kā

sannāTe ke rañgoñ jaisā āñgan hai

vahī ḳhvāb-e-talab hai

aur vahī dard-e-shikasta-pā jo shāyad ġhair-rasmī par

us dil ke ab tak zinda rah jaane kā tan-e-tanhā sabab hai

aur vahī kirdār-e-be-jā jo merī taqdīr se mansūb ho kar

is musallat-karda yak-tarfa kahānī ke kisī andhe kueñ meñ

nichlī zātoñ ke svembar jiit jaane vaale bad-qismat jarī kī tarah

kab se jāñ-ba-lab hai

haañ vahī is kī kahānī hai

jo aadam aur havvā kī nadāmat ke zamāne se bhī kuchh arsa purānī hai

kahānī kā safar jaarī hai

ye bhī itifāqan kā ek fitrī ek tadrījī amal hai

jo asātīrī khilaunoñ ko

kisī tārīḳh kī tadvīn tak

zīna-ba-zīna lā ke

un ko masḳh kar detā hai un meñ un kā apnā bholā-pan rahne nahīñ detā

aur is par ye ki us kā jabr

is baare meñ raavī ko

kisī bhī shaḳhs se

ik lafz bhī kahne nahīñ detā

kahānī meñ mirā kirdār hī maiñ huuñ

vahī maiñ huuñ vahī merī kahānī hai

wahi qissa mere dil ka

dil-e-wahshat-zada par baadalon ki tarah us umDe hue be-nam mausam ka

ki jo be-nam to tha hi kai barson se be-mani bhi ho kar rah gaya hai

aur ye main ne is liye likkha hai

kyun ki main ne is ke mani

be-had mazarat ke sath

ab tak

computer ke zamane ke kisi zarKHez-tar dil ke lughat mein bhi nahin dekhe

mere jazbon ke shaKH-o-barg par

be-shirkat-e-ghair yahi mausam hai jis ki hukmarani hai

wahi main hun wahi chaaron taraf raqsan meri afsurda shab hai

aur wahi meri thaki haari hui jagi hui roi hui aankhon ka

sannaTe ke rangon jaisa aangan hai

wahi KHwab-e-talab hai

aur wahi dard-e-shikasta-pa jo shayad ghair-rasmi par

us dil ke ab tak zinda rah jaane ka tan-e-tanha sabab hai

aur wahi kirdar-e-be-ja jo meri taqdir se mansub ho kar

is musallat-karda yak-tarfa kahani ke kisi andhe kuen mein

nichli zaton ke swembar jit jaane wale bad-qismat jari ki tarah

kab se jaan-ba-lab hai

han wahi is ki kahani hai

jo aadam aur hawwa ki nadamat ke zamane se bhi kuchh arsa purani hai

kahani ka safar jari hai

ye bhi itifaqan ka ek fitri ek tadriji amal hai

jo asatiri khilaunon ko

kisi tariKH ki tadwin tak

zina-ba-zina la ke

un ko masKH kar deta hai un mein un ka apna bhola-pan rahne nahin deta

aur is par ye ki us ka jabr

is bare mein rawi ko

kisi bhi shaKHs se

ek lafz bhi kahne nahin deta

kahani mein mera kirdar hi main hun

wahi main hun wahi meri kahani hai