waqt aur hum

shāh-e-vaqt kā apnā

koī chehra nahīñ hotā

ham ḳhādimoñ ne hī

us ke chehre ko is qadar

sañvār diyā hai

ki aa.ine ke sāmne

ghanToñ khaḌe rah kar vo ḳhud-bīnī kar sake

chehre ke bhītar dekho

ā.īna dar ā.īna chehra

vaqt ke paar dosto

ham ḳhud hī chehre haiñ

aur apne ā.īne bhī ḳhud haiñ

ham sab ke chehroñ meñ hī vaqt kā be-rahm chehra chhupā hai

hamārī sūratoñ se mil kar hī us kī sūrat bantī hai

ham faqīroñ ke paas

kuchh aur ho na ho kam-az-kam

ā.īna udhār kā nahīñ hai

kyoñ ki samay ko ham ne ḳhud gaḌhā hai apne hāthoñ

ham re.āyā ko ḳhud bulandī ke ā.īne se

āñkheñ churāne kī zarūrat nahīñ hai

shah-e-waqt ka apna

koi chehra nahin hota

hum KHadimon ne hi

us ke chehre ko is qadar

sanwar diya hai

ki aaine ke samne

ghanTon khaDe rah kar wo KHud-bini kar sake

chehre ke bhitar dekho

aaina dar aaina chehra

waqt ke par dosto

hum KHud hi chehre hain

aur apne aaine bhi KHud hain

hum sab ke chehron mein hi waqt ka be-rahm chehra chhupa hai

hamari suraton se mil kar hi us ki surat banti hai

hum faqiron ke pas

kuchh aur ho na ho kam-az-kam

aaina udhaar ka nahin hai

kyon ki samay ko hum ne KHud gaDha hai apne hathon

hum reaya ko KHud bulandi ke aaine se

aankhen churane ki zarurat nahin hai