waqt katib hai

vaqt kātib hai to mistar chehre

jab se tahrīr-shanāsī mirī taqdīr huī

vo ma.ānī pas-e-alfāz nazar aate haiñ

jin ko pahchān ke dil Dartā hai

aur har chehre se

ek hī chehra ubhar aatā hai

jo mirā chehra hai

aur imroz kā ā.īna ye kahtā hai ki dekh

ādmī-zāde tirī umar kī shaam aa pahuñchī

sar pe ab raakh utar aa.ī hai

barf kanpaTiyoñ par

sāl-hā-sāl ke ālām se chehra jaise

varaq-e-ḳhasta pe pechīda lakīroñ kā hujūm

harf-e-ummīd-o-rajā

dāġh-e-girya kī girah meñ gum hai

naqsh umañgoñ ke tamannāoñ ke

dukh ke dhabboñ ne dabā rakkhe haiñ

aaj ik umr ke ādarsh kī tasvīr jo dhundlā.ī hai

us kī tohmat

merī kam-koshī ke sar aa.ī hai

merī ḳhāmoshī ke sar aa.ī hai

lafz zanjīr huā

ḳhauf-e-darbāñ hai tazabzub zindāñ

zindagī jabr-e-musalsal ke sabab

sar-nigūñ sāyoñ kā sahrā-e-sukūt

ab ḳharābāt meñ ḳhākistar-e-ḳhvāb

DhūñDhtī phirtī hai hone kā subūt

vo bhī the jo inhīñ dushvār guzargāhoñ se

mish.al-e-harf liye parcham-e-himmat thāme

apne ḳhvāboñ ke ta.āqub meñ ravāñ

be-ḳhatar jaañ se guzar jaate the

maiñ yahāñ sard salāḳhoñ se lagā taktā huuñ

is bayābāñ meñ bhī kuchh ḳhvāboñ ke rasiyā chehre

parcham-e-harf liye nikle haiñ

Dar rahā huuñ ki agar jaañ se na guzre

to tazabzub ke siyah zindāñ meñ

vo mirī tarah pashīmāñ hoñge

waqt katib hai to mistar chehre

jab se tahrir-shanasi meri taqdir hui

wo maani pas-e-alfaz nazar aate hain

jin ko pahchan ke dil Darta hai

aur har chehre se

ek hi chehra ubhar aata hai

jo mera chehra hai

aur imroz ka aaina ye kahta hai ki dekh

aadmi-zade teri umar ki sham aa pahunchi

sar pe ab rakh utar aai hai

barf kanpaTiyon par

sal-ha-sal ke aalam se chehra jaise

waraq-e-KHasta pe pechida lakiron ka hujum

harf-e-ummid-o-raja

dagh-e-girya ki girah mein gum hai

naqsh umangon ke tamannaon ke

dukh ke dhabbon ne daba rakkhe hain

aaj ek umr ke aadarsh ki taswir jo dhundlai hai

us ki tohmat

meri kam-koshi ke sar aai hai

meri KHamoshi ke sar aai hai

lafz zanjir hua

KHauf-e-darban hai tazabzub zindan

zindagi jabr-e-musalsal ke sabab

sar-nigun sayon ka sahra-e-sukut

ab KHarabaat mein KHakistar-e-KHwab

DhunDhti phirti hai hone ka subut

wo bhi the jo inhin dushwar guzargahon se

mishal-e-harf liye parcham-e-himmat thame

apne KHwabon ke taaqub mein rawan

be-KHatar jaan se guzar jate the

main yahan sard salaKHon se laga takta hun

is bayaban mein bhi kuchh KHwabon ke rasiya chehre

parcham-e-harf liye nikle hain

Dar raha hun ki agar jaan se na guzre

to tazabzub ke siyah zindan mein

wo meri tarah pashiman honge