waqt ki baat

vaqt hairān nigāhoñ se mujhe dekhtā hai

dekh kar haal ko shāyad use maazī kā ḳhayāl aatā hai

vaqt jab bhī kisī zartāb o hasīñ maazī ke gahnā.e hue

haal se do-chār huā kaañp uThā

us ko ma.alūm nahīñ hai maazī

kis tarah haal ke sāñche meñ bigaḌ jaatā hai

tū magar jāntī hai

talḳhi-e-zīst damakte hue shādāb o javāñ chehroñ ko

kaise afsurda-o-pazhmurda banā detī hai

kisī tarah shām-e-ḳhizāñ sub.h-e-bahārāñ bikhar jaatī hai

tū mujhe dekh kar hairān na ho

maiñ vahī huuñ tū jise hāsil-e-ummīd kahā kartī thī

maiñ vahī huuñ tū jise pahle-pahal dekh ke chauñk uTThī thī

aur ab dekh ke ye haal mire maazī kā hairān hai tū

dekh hairān na ho

vaqt hairānī pe majbūr hai ma.alūm nahīñ hai is ko

maazī kyuuñ haal ke sāñche meñ bigaḌ jaatā hai

aur tū vaqt nahīñ

waqt hairan nigahon se mujhe dekhta hai

dekh kar haal ko shayad use mazi ka KHayal aata hai

waqt jab bhi kisi zartab o hasin mazi ke gahnae hue

haal se do-chaar hua kanp uTha

us ko malum nahin hai mazi

kis tarah haal ke sanche mein bigaD jata hai

tu magar jaanti hai

talKHi-e-zist damakte hue shadab o jawan chehron ko

kaise afsurda-o-pazhmurda bana deti hai

kisi tarah sham-e-KHizan subh-e-bahaaran bikhar jati hai

tu mujhe dekh kar hairan na ho

main wahi hun tu jise hasil-e-ummid kaha karti thi

main wahi hun tu jise pahle-pahal dekh ke chaunk uTThi thi

aur ab dekh ke ye haal mere mazi ka hairan hai tu

dekh hairan na ho

waqt hairani pe majbur hai malum nahin hai is ko

mazi kyun haal ke sanche mein bigaD jata hai

aur tu waqt nahin