waqt ki qadr

dāvat

bahār bītne vaalī hai aa bhī jā salmā

chaman kī god meñ aa kar samā bhī jā salmā

kalī kalī meñ bahāreñ basā bhī jā salmā

mujhe junūñ kā sabaq phir paḌhā bhī jā salmā

bahār bītne vaalī hai aa bhī jā salmā

mileñge hashr meñ mat kah ye baar baar mujhe

ho kaise hashr ke va.ade pe e'tibār mujhe

ḳhudā ke dil pe nahīñ koī iḳhtiyār mujhe

ḳhudā ko maan yahīñ hashr uThā bhī jā salmā

bahār bītne vaalī hai aa bhī jā salmā

nashāt-e-umr ko ummīd par nisār na kar

visāl-e-sub.h-e-qayāmat kā intizār na kar

riyāz-e-ḳhuld kī bātoñ kā e'tibār na kar

fareb vāda-e-fardā miTā bhī jā salmā

bahār bītne vaalī hai aa bhī jā salmā

kise ḳhabar hai qayāmat meñ ham mileñ na mileñ

fazā-e-rauz-e-jannat meñ ham mileñ na mileñ

kashākash-e-abadiyyat meñ ham mileñ na mileñ

kashākash-e-abadiyyat bhulā bhī jā salmā

bahār bītne vaalī hai aa bhī jā salmā

gañvā na sog meñ apne shabāb kī rāteñ

nazar na ā.eñgī phir māhtāb kī rāteñ

ye nik.hatoñ kā hujūm aur ye ḳhvāb kī rāteñ

fazā meñ ḳhvāb-e-hasīñ ban ke chhā bhī jā salmā

bahār bītne vaalī hai aa bhī jā salmā

ḳhabar le jald ki umr-e-azīz faanī hai

sarā-e-dahr kī har chiiz ānī-jānī hai

ba-rañg-e-abr-e-ravāñ fasl-e-naujavānī hai

chhalakne vaalā hai sāġhar pilā bhī jā salmā

bahār bītne vaalī hai aa bhī jā salmā

kise ḳhabar ye ghaTā.eñ raheñ raheñ na raheñ

ye nik.hateñ ye havā.eñ raheñ raheñ na raheñ

ye mastiyāñ ye fazā.eñ raheñ raheñ na raheñ

sharāb-e-vasl kā sāġhar pilā bhī jā salmā

bahār bītne vaalī hai aa bhī jā salmā

sabāt-e-ahd zamāne meñ kisī ne paayā hai

zamāna rañg badalne ko rañg laayā hai

bahār-e-umr-e-ravāñ bādaloñ kā saayā hai

bahār-e-umr kī ḳhushiyāñ manā bhī jā salmā

bahār bītne vaalī hai aa bhī jā salmā

tire ḳhayāl ko dil meñ basā.e baiThe haiñ

ḳhudā.ī ho ki ḳhudā ho bhulā.e baiThe haiñ

surūr-e-ahd-e-javānī luTā.e baiThe haiñ

tū aa ke qadr-e-javānī sikhā bhī jā salmā

bahār bītne vaalī hai aa bhī jā salmā

ye fasl aur ye bahāreñ nazar na ā.eñgī phir

ye bādaloñ kī qatāreñ nazar na ā.eñgī phir

ye halkī halkī phuvāreñ nazar na ā.eñgī phir

sharāb-e-aish-e-masarrat luñDhā bhī jā salmā

bahār bītne vaalī hai aa bhī jā salmā

batā tū kyā ye nazāre ujaḌ na jā.eñge

ye naddiyāñ ye kināre ujaḌ na jā.eñge

ye chāñd aur ye kināre ujaḌ na jā.eñge

sitāra-vār shuā.eñ luTā bhī bhī jā salmā

bahār bītne vaalī hai aa bhī jā salmā

ġhamoñ pe kī haiñ fidā shādmāniyāñ ham ne

ḳhudā ke naam pe taj diiñ javāniyāñ ham ne

guzār dī haiñ yūñhī zindagāniyāñ ham ne

dam-e-aḳhīr tū ġham se chhuḌā bhī jā salmā

bahār bītne vaalī hai aa bhī jā salmā

fanā-nasīb haiñ ye sabza-zār ke manzar

ye kohsār dil-e-jūebār ke manzar

nazar na ā.eñge phir ye bahār ke manzar

abhī samāñ hai bahāreñ dikhā bhī jā salmā

bahār bītne vaalī hai aa bhī jā salmā

ḳhabar le jald ki bahkī huī bahār hai aaj

nashāt-e-ḳhuld se ma.amūr sabza-zār hai aaj

ajal pe bhī mirī hastī ko iḳhtiyār hai aaj

ġhurūr-e-ishq kī himmat baḌhā bhī jā salmā

bahār bītne vaalī hai aa bhī jā salmā

tū hukm de to sitāroñ ko chhīn lā.ūñ maiñ

falak se us ke nazāroñ ko chhīn lā.ūñ maiñ

iram kī mast bahāroñ ko chhīn lā.ūñ maiñ

ḳhudā.ī ko ye tamāshā dikhā bhī jā salmā

bahār bītne vaalī hai aa bhī jā salmā

tū sāmne ho to kaun-o-makāñ ko gum kar duuñ

ḳham-e-tarab meñ ḳham-e-āsmāñ ko gum kar duuñ

duī ho fard to donoñ jahāñ ko gum kar duuñ

ba-rañg-e-rūh badan meñ samā bhī jā salmā

bahār bītne vaalī hai aa bhī jā salmā

dawat

bahaar bitne wali hai aa bhi ja salma

chaman ki god mein aa kar sama bhi ja salma

kali kali mein bahaaren basa bhi ja salma

mujhe junun ka sabaq phir paDha bhi ja salma

bahaar bitne wali hai aa bhi ja salma

milenge hashr mein mat kah ye bar bar mujhe

ho kaise hashr ke wade pe e'tibar mujhe

KHuda ke dil pe nahin koi iKHtiyar mujhe

KHuda ko man yahin hashr uTha bhi ja salma

bahaar bitne wali hai aa bhi ja salma

nashat-e-umr ko ummid par nisar na kar

visal-e-subh-e-qayamat ka intizar na kar

riyaz-e-KHuld ki baaton ka e'tibar na kar

fareb wada-e-farda miTa bhi ja salma

bahaar bitne wali hai aa bhi ja salma

kise KHabar hai qayamat mein hum milen na milen

faza-e-rauz-e-jannat mein hum milen na milen

kashakash-e-abadiyyat mein hum milen na milen

kashakash-e-abadiyyat bhula bhi ja salma

bahaar bitne wali hai aa bhi ja salma

ganwa na sog mein apne shabab ki raaten

nazar na aaengi phir mahtab ki raaten

ye nikhaton ka hujum aur ye KHwab ki raaten

faza mein KHwab-e-hasin ban ke chha bhi ja salma

bahaar bitne wali hai aa bhi ja salma

KHabar le jald ki umr-e-aziz fani hai

sara-e-dahr ki har chiz aani-jaani hai

ba-rang-e-abr-e-rawan fasl-e-naujawani hai

chhalakne wala hai saghar pila bhi ja salma

bahaar bitne wali hai aa bhi ja salma

kise KHabar ye ghaTaen rahen rahen na rahen

ye nikhaten ye hawaen rahen rahen na rahen

ye mastiyan ye fazaen rahen rahen na rahen

sharab-e-wasl ka saghar pila bhi ja salma

bahaar bitne wali hai aa bhi ja salma

sabaat-e-ahd zamane mein kisi ne paya hai

zamana rang badalne ko rang laya hai

bahaar-e-umr-e-rawan baadalon ka saya hai

bahaar-e-umr ki KHushiyan mana bhi ja salma

bahaar bitne wali hai aa bhi ja salma

tere KHayal ko dil mein basae baiThe hain

KHudai ho ki KHuda ho bhulae baiThe hain

surur-e-ahd-e-jawani luTae baiThe hain

tu aa ke qadr-e-jawani sikha bhi ja salma

bahaar bitne wali hai aa bhi ja salma

ye fasl aur ye bahaaren nazar na aaengi phir

ye baadalon ki qataren nazar na aaengi phir

ye halki halki phuwaren nazar na aaengi phir

sharab-e-aish-e-masarrat lunDha bhi ja salma

bahaar bitne wali hai aa bhi ja salma

bata tu kya ye nazare ujaD na jaenge

ye naddiyan ye kinare ujaD na jaenge

ye chand aur ye kinare ujaD na jaenge

sitara-war shuaen luTa bhi bhi ja salma

bahaar bitne wali hai aa bhi ja salma

ghamon pe ki hain fida shadmaniyan hum ne

KHuda ke nam pe taj din jawaniyan hum ne

guzar di hain yunhi zindaganiyan hum ne

dam-e-aKHir tu gham se chhuDa bhi ja salma

bahaar bitne wali hai aa bhi ja salma

fana-nasib hain ye sabza-zar ke manzar

ye kohsar dil-e-juebar ke manzar

nazar na aaenge phir ye bahaar ke manzar

abhi saman hai bahaaren dikha bhi ja salma

bahaar bitne wali hai aa bhi ja salma

KHabar le jald ki bahki hui bahaar hai aaj

nashat-e-KHuld se mamur sabza-zar hai aaj

ajal pe bhi meri hasti ko iKHtiyar hai aaj

ghurur-e-ishq ki himmat baDha bhi ja salma

bahaar bitne wali hai aa bhi ja salma

tu hukm de to sitaron ko chhin laun main

falak se us ke nazaron ko chhin laun main

iram ki mast bahaaron ko chhin laun main

KHudai ko ye tamasha dikha bhi ja salma

bahaar bitne wali hai aa bhi ja salma

tu samne ho to kaun-o-makan ko gum kar dun

KHam-e-tarab mein KHam-e-asman ko gum kar dun

dui ho fard to donon jahan ko gum kar dun

ba-rang-e-ruh badan mein sama bhi ja salma

bahaar bitne wali hai aa bhi ja salma