waqt

ye nannhī sī guḌiyā

jise do baras ho ga.e haiñ

maiñ japan se le kar aayā

ye raqqāsa rangīn kapḌoñ meñ malbūs

isī ek andāz se do baras se khaḌī hai

na pallū hī sarkā

na hāthoñ se rūmāl rangīñ hī chhūTā

na sar se ye tāj-e-sarfarāzī-o-kaj-kulāhī haTā

us kā vaisā hī ma.asūm chehra

vahī zer-e-lab muskurāhaT

vahī qaus-e-abrū

vahī chashm-e-bīnā

javāñ jāvedāñ

ye guḌiyā ye raqqāsa ye vaqt kā nuqta-e-markazī

jism ke paiham ravāñ an-ginat dā.eroñ meñ

pareshān-o-āvāra phirtā rahā huuñ

mirā chehra ik dāstāñ hai

mirī umr-e-rafta kī

in gardishoñ kī

magar fāsla hai ki vaise kā vaisā rahā

mere kamre meñ ye aaj bhī

mere nazdīk itnī hai jitnī koī do baras qabl thī

farq itnā hai

ye vaqt kā nuqta-e-markazī

aur maiñ vaqt ke dā.eroñ meñ asiir

ye nannhi si guDiya

jise do baras ho gae hain

main japan se le kar aaya

ye raqqasa rangin kapDon mein malbus

isi ek andaz se do baras se khaDi hai

na pallu hi sarka

na hathon se rumal rangin hi chhuTa

na sar se ye taj-e-sarfaraazi-o-kaj-kulahi haTa

us ka waisa hi masum chehra

wahi zer-e-lab muskurahaT

wahi qaus-e-abru

wahi chashm-e-bina

jawan jawedan

ye guDiya ye raqqasa ye waqt ka nuqta-e-markazi

jism ke paiham rawan an-ginat daeron mein

pareshan-o-awara phirta raha hun

mera chehra ek dastan hai

meri umr-e-rafta ki

in gardishon ki

magar fasla hai ki waise ka waisa raha

mere kamre mein ye aaj bhi

mere nazdik itni hai jitni koi do baras qabl thi

farq itna hai

ye waqt ka nuqta-e-markazi

aur main waqt ke daeron mein asir