wasiyyat

mire beTe mirī āñkheñ mire ba.ad un ko de denā

jinhoñ ne ret meñ sar gaaḌ rakkhe haiñ

aur aise mutma.in haiñ jaise un ko

na koī dekhtā hai aur na koī dekh saktā hai

magar ye vaqt kī jāsūs nazreñ

jo pīchhā kartī haiñ sab kā zamīroñ ke añdhere tak

añdherā nuur par rahtā hai ġhālib bas savere tak

saverā hone vaalā hai

(2)

mire beTe mirī āñkheñ mire ba.ad un ko de denā

kuchh andhe sūrmā jo tiir añdhere meñ chalāte haiñ

sadā dushman kā siina tākte ḳhud zaḳhm khāte haiñ

lagā kar jo vatan ko daav par kursī bachāte haiñ

bhunā kar khoTe sikke dharm ke jo pun kamāte haiñ

jatā do un ko aise Thag kabhī pakḌe bhī jaate haiñ

(3)

mire beTe unheñ thoḌī sī ḳhuddārī bhī de denā

jo hākim qarz le ke is ko apnī jiit kahte haiñ

jahāñ rakhte haiñ sonā rehn ḳhud bhī rehn rahte haiñ

aur is ko bhī vo apnī jiit kahte haiñ

sharīk-e-jurm haiñ ye sun ke jo ḳhāmosh rahte haiñ

qusūr apnā ye kyā kam hai ki ham sab un ko sahte haiñ

(4)

mire beTe mire ba.ad un ko merā dil bhī de denā

ki jo shar rakhte haiñ siine meñ apne dil nahīñ rakhte

hai un kī āstīñ meñ vo bhī jo qātil nahīñ rakhte

jo chalte haiñ unhīñ rastoñ pe jo manzil nahīñ rakhte

ye majnūñ apnī nazroñ meñ koī mahmil nahīñ rakhte

ye apne paas kuchh bhī faḳhr ke qābil nahīñ rakhte

taras khā kar jinheñ jantā ne kursī par biThāyā hai

vo ḳhud se to na uTTheñge unheñ tum hī uThā denā

ghaTā.ī hai jinhoñ ne itnī qīmat apne sikke kī

ye zimma hai tumhārā un kī qīmat tum ghaTā denā

jo vo phailā.eñ dāman ye vasiyyat yaad kar lenā

unheñ har chiiz de denā par un ko vote mat denā

mere beTe meri aankhen mere baad un ko de dena

jinhon ne ret mein sar gaD rakkhe hain

aur aise mutmain hain jaise un ko

na koi dekhta hai aur na koi dekh sakta hai

magar ye waqt ki jasus nazren

jo pichha karti hain sab ka zamiron ke andhere tak

andhera nur par rahta hai ghaalib bas sawere tak

sawera hone wala hai

(2)

mere beTe meri aankhen mere baad un ko de dena

kuchh andhe surma jo tir andhere mein chalate hain

sada dushman ka sina takte KHud zaKHm khate hain

laga kar jo watan ko daw par kursi bachate hain

bhuna kar khoTe sikke dharm ke jo pun kamate hain

jata do un ko aise Thag kabhi pakDe bhi jate hain

(3)

mere beTe unhen thoDi si KHuddari bhi de dena

jo hakim qarz le ke is ko apni jit kahte hain

jahan rakhte hain sona rehn KHud bhi rehn rahte hain

aur is ko bhi wo apni jit kahte hain

sharik-e-jurm hain ye sun ke jo KHamosh rahte hain

qusur apna ye kya kam hai ki hum sab un ko sahte hain

(4)

mere beTe mere baad un ko mera dil bhi de dena

ki jo shar rakhte hain sine mein apne dil nahin rakhte

hai un ki aastin mein wo bhi jo qatil nahin rakhte

jo chalte hain unhin raston pe jo manzil nahin rakhte

ye majnun apni nazron mein koi mahmil nahin rakhte

ye apne pas kuchh bhi faKHr ke qabil nahin rakhte

taras kha kar jinhen janta ne kursi par biThaya hai

wo KHud se to na uTThenge unhen tum hi uTha dena

ghaTai hai jinhon ne itni qimat apne sikke ki

ye zimma hai tumhaara un ki qimat tum ghaTa dena

jo wo phailaen daman ye wasiyyat yaad kar lena

unhen har chiz de dena par un ko wote mat dena