wasl

sahar ke vaqt

kuñvārī zamīn shabnam meñ nahā ke leTī hai

vo sabz chādar-e-gul-tāb

āriz-e-mahtāb

ḳhumār-e-ḳhvāb kā aalam

vo intizār kā aalam

ki duur des se jaise

kabhī to aa.egā

vo duur des se sūraj kā devtā aayā

aur apnī tez nigāhoñ se gudgudī kartā

vo jauf-ul-arz ke nisfunnahār par pahuñchā

zamīñ pe ḳhauf kī ik zard lahar sī phailī

magar vo sabz sā jaadū kuñvārī dulhan kā

fazā pe chhā hī gayā ik ḳhumār kā aalam

utar gayā hare shīshe meñ devtā āḳhir

vo shaam lams dhuñdalkā

laboñ kā rang laboñ meñ ghulā

hasīn thā manzar

lazīz thā lamha

havā kī añgḌā.ī

aur us ke baa'd bhayānak havā ke zanāTe

sahar ke waqt

kunwari zamin shabnam mein naha ke leTi hai

wo sabz chadar-e-gul-tab

aariz-e-mahtab

KHumar-e-KHwab ka aalam

wo intizar ka aalam

ki dur des se jaise

kabhi to aaega

wo dur des se suraj ka dewta aaya

aur apni tez nigahon se gudgudi karta

wo jauf-ul-arz ke nisfunnahaar par pahuncha

zamin pe KHauf ki ek zard lahar si phaili

magar wo sabz sa jadu kunwari dulhan ka

faza pe chha hi gaya ek KHumar ka aalam

utar gaya hare shishe mein dewta aaKHir

wo sham lams dhundalka

labon ka rang labon mein ghula

hasin tha manzar

laziz tha lamha

hawa ki angDai

aur us ke ba'd bhayanak hawa ke zanaTe