wazir ka KHwab

maiñ ne ik din ḳhvāb meñ dekhā ki ik mujh sā faqīr

gardish-e-paimāna-e-imroz-o-fardā kā asiir

garche bilkul be-gunah thā ho gayā lekin vazīr

ya.anī ik jhoñkā jo aayā bujh ga.ī sham-e-zamīr

muft meñ koThī milī motor milī p.a milā

jab gayā picnic pe bāhar tour kā T.a milā

jab huā mujh par mulammā baḌh ga.ī kuchh āb-o-tāb

Daal lī masrūfiyat kī apne chehre par naqāb

mujh se izzat-dār Darte haiñ maiñ huuñ izzat-ma.āb

''iiñ ki mī bīnam ba bedārīst yārab yā ba ḳhvāb''

ḳhud bhī dil meñ soch kar ye baat sharmātā huuñ maiñ

rāste vīrān ho jaate haiñ jab jaatā huuñ maiñ

ab ye hālat hai ġhizā achchhī hai kapḌe bhī nafīs

aur añgrezī zabāñ bhī bol letā huuñ salīs

mujh se milne ke liye aate haiñ mulkoñ ke ra.iis

raat din lekin nazar meñ mujh ko rakhtī hai police

sab mujhe pahchānte haiñ kis qadar paanī meñ huuñ

huuñ nigahbāñ qaum kā aur ḳhud nigahbānī meñ huuñ

mujh se milne ko sharīf insān aa sakte nahīñ

bār-e-ġham yārān-e-derīna uThā sakte nahīñ

dard-e-dil sunte nahīñ mujh ko sunā sakte nahīñ

biivī aur bachche bhī khānā saath khā sakte nahīñ

sun ke ye farzand se hotī hai hairānī mujhe

''likh diyā min-jumla-e-asbāb-e-vīrānī mujhe''

merī sūrat ko tarastā hai jo tifl-e-shīr-ḳhār

ho chuke haiñ is ke abbā mulk-o-millat par nisār

sab ḳhushāmad-pesha, duniyā-dār aur be-rozgār

raat din milne ko aate haiñ qatār-andar-qatār

jo bhī aa.e us se va.ada kuchh na kuchh kartā huuñ maiñ

sar par aa pahuñchā election is liye Dartā huuñ maiñ

fileñ ghar meñ paḌī haiñ aur daftar meñ hai ghar

shaġhl-e-bekārī bahut hai vaqt behad muḳhtasar

raat din sar par musallat lunch asrāne dinner

aur hukūmat ḳharch agar de de to haj kā bhī safar

āj-kal pesh-e-nazar hai mulk-o-millat kī falāh

ik bhatīje kī dukāñ kā bhī karūñgā iftitāh

mulk ke andar jo aḳhbāroñ ke haiñ nāma-nigār

jin ko bā-izzat nahīñ miltā hai koī rozgār

chaa.e kī dāvat pe ghar bulvā ke un ko baar baar

un se kahtā huuñ ki likkho kuchh na kuchh ham par bhī yaar

vo ye likh dete haiñ akasr achchhī bāteñ is kī haiñ

''nīñd us kī hai dimāġh us kā hai rāteñ us kī haiñ''

mujh se milne aa.e bairūnī mamālik se bashar

vo haiñ merī mamlikat se mujh se zyāda bā-ḳhabar

chāhtā huuñ maiñ ki un se guftugū ho muḳhtasar

vo ye kahte haiñ ki rakh do saare daftar khol kar

vo zamīñ kī pūchhte haiñ āsmāñ kahtā huuñ maiñ

jab samajh meñ kuchh nahīñ aatā to haañ kahtā huuñ maiñ

mulk kā ġham hai na ham ko millat-e-baizā kā ġham

''barq se karte haiñ raushan sham-e-mātam-ḳhāna ham''

garche jāhil huuñ par itnā jāntā huuñ kam se kam

saarī duniyā meñ agar kuchh hai to insāñ kā shikam

ai shikam mere tan-e-fānī ke sadr-e-anjuman

''tū agar merā nahīñ bantā na ban apnā to ban''

mere ik saale kī ik sasurāl kā ik rishta-dār

apnī koshish se mulāzim ho gayā thā ek baar

kyūñki jo sab kā hai us kā bhī hai vo parvardigār

ḳhvesh-parvar hākimoñ meñ ho gayā merā shumār

ab aziiz aa jaa.eñ milne ko to ghabrātā huuñ maiñ

DhūñDte phirte haiñ mujh ko ghar meñ kho jaatā huuñ maiñ

bārgāh-e-haq meñ hāzir ho ke maiñ ne kī duā

peT se machhlī ke yūnus ko kiyā tū ne rihā

qaid se yūsuf ko tū ne izn-e-āzādī diyā

is bhayānak ḳhvāb se āzād kar mujh ko ḳhudā

maiñ nikālā jā.ūñgā be-dast-o-pā aur sar khulā

''jitne arsa meñ mirā lipTā huā bistar khulā''

main ne ek din KHwab mein dekha ki ek mujh sa faqir

gardish-e-paimana-e-imroz-o-farda ka asir

garche bilkul be-gunah tha ho gaya lekin wazir

yani ek jhonka jo aaya bujh gai sham-e-zamir

muft mein koThi mili motor mili pa mila

jab gaya picnic pe bahar tour ka Ta mila

jab hua mujh par mulamma baDh gai kuchh aab-o-tab

Dal li masrufiyat ki apne chehre par naqab

mujh se izzat-dar Darte hain main hun izzat-maab

in ki mi binam ba bedarist yarab ya ba KHwab

KHud bhi dil mein soch kar ye baat sharmata hun main

raste viran ho jate hain jab jata hun main

ab ye haalat hai ghiza achchhi hai kapDe bhi nafis

aur angrezi zaban bhi bol leta hun salis

mujh se milne ke liye aate hain mulkon ke rais

raat din lekin nazar mein mujh ko rakhti hai police

sab mujhe pahchante hain kis qadar pani mein hun

hun nigahban qaum ka aur KHud nigahbani mein hun

mujh se milne ko sharif insan aa sakte nahin

bar-e-gham yaran-e-derina uTha sakte nahin

dard-e-dil sunte nahin mujh ko suna sakte nahin

biwi aur bachche bhi khana sath kha sakte nahin

sun ke ye farzand se hoti hai hairani mujhe

likh diya min-jumla-e-asbab-e-virani mujhe

meri surat ko tarasta hai jo tifl-e-shir-KHar

ho chuke hain is ke abba mulk-o-millat par nisar

sab KHushamad-pesha, duniya-dar aur be-rozgar

raat din milne ko aate hain qatar-andar-qatar

jo bhi aae us se wada kuchh na kuchh karta hun main

sar par aa pahuncha election is liye Darta hun main

filen ghar mein paDi hain aur daftar mein hai ghar

shaghl-e-bekari bahut hai waqt behad muKHtasar

raat din sar par musallat lunch asrane dinner

aur hukumat KHarch agar de de to haj ka bhi safar

aaj-kal pesh-e-nazar hai mulk-o-millat ki falah

ek bhatije ki dukan ka bhi karunga iftitah

mulk ke andar jo aKHbaron ke hain nama-nigar

jin ko ba-izzat nahin milta hai koi rozgar

chae ki dawat pe ghar bulwa ke un ko bar bar

un se kahta hun ki likkho kuchh na kuchh hum par bhi yar

wo ye likh dete hain akasr achchhi baaten is ki hain

nind us ki hai dimagh us ka hai raaten us ki hain

mujh se milne aae bairuni mamalik se bashar

wo hain meri mamlikat se mujh se zyaada ba-KHabar

chahta hun main ki un se guftugu ho muKHtasar

wo ye kahte hain ki rakh do sare daftar khol kar

wo zamin ki puchhte hain aasman kahta hun main

jab samajh mein kuchh nahin aata to han kahta hun main

mulk ka gham hai na hum ko millat-e-baiza ka gham

barq se karte hain raushan sham-e-matam-KHana ham

garche jahil hun par itna jaanta hun kam se kam

sari duniya mein agar kuchh hai to insan ka shikam

ai shikam mere tan-e-fani ke sadr-e-anjuman

tu agar mera nahin banta na ban apna to ban

mere ek sale ki ek sasural ka ek rishta-dar

apni koshish se mulazim ho gaya tha ek bar

kyunki jo sab ka hai us ka bhi hai wo parwardigar

KHwesh-parwar hakimon mein ho gaya mera shumar

ab aziz aa jaen milne ko to ghabraata hun main

DhunDte phirte hain mujh ko ghar mein kho jata hun main

bargah-e-haq mein hazir ho ke main ne ki dua

peT se machhli ke yunus ko kiya tu ne riha

qaid se yusuf ko tu ne izn-e-azadi diya

is bhayanak KHwab se aazad kar mujh ko KHuda

main nikala jaunga be-dast-o-pa aur sar khula

jitne arsa mein mera lipTa hua bistar khula