wazire chunin

to jab saat sau āThvīñ raat aa.ī

to kahne lagī shaharzād:

ai javāñ-baḳht

shīrāz meñ ek rahtā thā nā.ī;

vo naa.ī to thā hī

magar us ko baḳhshā thā qudrat ne

ik aur nādir girāñ-tar hunar bhī

ki jab bhī

kisī mard-e-dānā kā zehn-e-rasā

zañg-ālūda hone ko aatā

to naa.ī ko jā kar dikhātā

ki naa.ī dimāġhoñ kā mash.hūr māhir thā

vo kāsa-e-sar se un ko alag kar ke

in kī sab ālā.isheñ paak kar ke

phir apnī jagah par lagāne ke fan meñ thā kāmil

ḳhudā kā ye karnā huā

ek din

is kī dukāñ se

īrān kā ik vazīr-e-kuhan-sāl guzrā

aur is ne chāhā

ki vo bhī zarā

apne uljhe hue zehn kī

az sar-e-nau safā.ī karā le

kiyā kāsa-e-sar ko naa.ī ne ḳhālī

abhī vo use saaf karne lagā thā

ki nāgāh aa kar kahā ek ḳhvāja-sarā ne:

maiñ bhejā gayā huuñ janāb-e-vazārat-e-panah ko bulāne

aur is par

sarāsīma ho kar jo uTThā vazīr ek dam

rah gayā paas dallāk ke maġhz us kā

vo be-maġhz sar le ke darbār-e-sultāñ meñ pahuñchā

magar dūsre roz is ne

jo naa.ī se aa kar taqāzā kiyā

to vo kahne lagā:

haif

kal shab paḌosī kī billī

kisī rauzan-e-dar se ghus kar

janāb-e-vazārat-e-panah ke

dimāġh-e-falak-tāz ko khā ga.ī hai

aur ab hukm-e-sarkār ho to

kisī aur haivān kā maġhz le kar lagā duuñ

to dallāk ne rakh diyā

dāniyāl-e-zamāna ke sar meñ

kisī bail kā maġhz le kar

to logoñ ne dekhā

janāb-e-vazārat-e-panah ab

farāsat meñ

dānish meñ

aur kārobār-e-vazārat meñ

pahle se bhī chāq-o-chauband-tar ho ga.e haiñ

to jab sat sau aaThwin raat aai

to kahne lagi shaharzad:

ai jawan-baKHt

shiraaz mein ek rahta tha nai;

wo nai to tha hi

magar us ko baKHsha tha qudrat ne

ek aur nadir giran-tar hunar bhi

ki jab bhi

kisi mard-e-dana ka zehn-e-rasa

zang-aluda hone ko aata

to nai ko ja kar dikhata

ki nai dimaghon ka mashhur mahir tha

wo kasa-e-sar se un ko alag kar ke

in ki sab aalaishen pak kar ke

phir apni jagah par lagane ke fan mein tha kaamil

KHuda ka ye karna hua

ek din

is ki dukan se

iran ka ek wazir-e-kuhan-sal guzra

aur is ne chaha

ki wo bhi zara

apne uljhe hue zehn ki

az sar-e-nau safai kara le

kiya kasa-e-sar ko nai ne KHali

abhi wo use saf karne laga tha

ki nagah aa kar kaha ek KHwaja-sara ne:

main bheja gaya hun janab-e-wazarat-e-panah ko bulane

aur is par

sarasima ho kar jo uTTha wazir ek dam

rah gaya pas dallak ke maghz us ka

wo be-maghz sar le ke darbar-e-sultan mein pahuncha

magar dusre roz is ne

jo nai se aa kar taqaza kiya

to wo kahne laga:

haif

kal shab paDosi ki billi

kisi rauzan-e-dar se ghus kar

janab-e-wazarat-e-panah ke

dimagh-e-falak-taz ko kha gai hai

aur ab hukm-e-sarkar ho to

kisi aur haiwan ka maghz le kar laga dun

to dallak ne rakh diya

daniyal-e-zamana ke sar mein

kisi bail ka maghz le kar

to logon ne dekha

janab-e-wazarat-e-panah ab

farasat mein

danish mein

aur karobar-e-wazarat mein

pahle se bhi chaq-o-chauband-tar ho gae hain