wed

faiz-e-qudrat se jo taqdīr khulī aalam kī

sāhil-e-hind pe vahdat kī tajallī chamkī

miT ga.ī jahl kī shab sub.h kā taara chamkā

āriya-vart kī qismat kā sitārā chamkā

ahl-e-dil par huī kaifiyyat-e-irfāñ taarī

jin se duniyā meñ huiiñ diin kī nahreñ jaarī

thiiñ khulī jalva-gah-e-ḳhās meñ rāheñ un kī

vāqif-e-rāz-e-haqīqat thiiñ nigāheñ un kī

arsh se un ke liye nūr-e-ḳhudā aayā thā

banda-e-ḳhās the rishiyoñ kā laqab paayā thā

ved un ke dil-e-haq-kesh kī tasvīreñ haiñ

jalva-e-qudrat-e-mābūd kī tafsīreñ haiñ

ain kasrat meñ ye vahdat kā sabaq ved meñ hai

ek hī nuur hai jo zarra o ḳhurshed meñ hai

jis se insān meñ hai josh-e-javānī paidā

isī jauhar se hai maujoñ meñ ravānī paidā

rang gulshan meñ fazā dāman-e-kohsār meñ hai

ḳhuuñ rag-e-gul meñ hai nashtar kī ḳhalish ḳhaar meñ hai

tamkanat husn meñ hai josh hai dīvāne meñ

raushnī sham.a meñ hai nuur hai parvāne meñ

rang-o-bū ho ke samāyā vahī gulzāroñ meñ

abr ban kar vahī barsā kiyā kohsāroñ meñ

shauq ho kar dil-e-majzūb pe chhāyā hai vahī

dard ban kar dil-e-shā.ir meñ samāyā hai vahī

nūr-e-īmāñ se jo paidā ho safā siine meñ

aks us kā nazar aatā hai is ā.īne meñ

faiz-e-qudrat se jo taqdir khuli aalam ki

sahil-e-hind pe wahdat ki tajalli chamki

miT gai jahl ki shab subh ka tara chamka

aariya-wart ki qismat ka sitara chamka

ahl-e-dil par hui kaifiyyat-e-irfan tari

jin se duniya mein huin din ki nahren jari

thin khuli jalwa-gah-e-KHas mein rahen un ki

waqif-e-raaz-e-haqiqat thin nigahen un ki

arsh se un ke liye nur-e-KHuda aaya tha

banda-e-KHas the rishiyon ka laqab paya tha

wed un ke dil-e-haq-kesh ki taswiren hain

jalwa-e-qudrat-e-mabud ki tafsiren hain

ain kasrat mein ye wahdat ka sabaq wed mein hai

ek hi nur hai jo zarra o KHurshed mein hai

jis se insan mein hai josh-e-jawani paida

isi jauhar se hai maujon mein rawani paida

rang gulshan mein faza daman-e-kohsar mein hai

KHun rag-e-gul mein hai nashtar ki KHalish KHar mein hai

tamkanat husn mein hai josh hai diwane mein

raushni shama mein hai nur hai parwane mein

rang-o-bu ho ke samaya wahi gulzaron mein

abr ban kar wahi barsa kiya kohsaron mein

shauq ho kar dil-e-majzub pe chhaya hai wahi

dard ban kar dil-e-shair mein samaya hai wahi

nur-e-iman se jo paida ho safa sine mein

aks us ka nazar aata hai is aaine mein