wirsa

beTiyāñ bhī to maaoñ jaisī hotī haiñ

zabt ke zard āñchal meñ apne

saare dard chhupā letī haiñ

rote rote hans paḌtī haiñ

hañste hañste dil hī dil meñ ro letī haiñ

ḳhushī kī ḳhvāhish karte karte

ḳhvāb aur ḳhaak meñ aT jaatī haiñ

sau hissoñ meñ baT jaatī haiñ

ghar ke darvāze par baiThī

ummīdoñ ke resham bunte saarī umr gañvā

detī haiñ

maiñ jo ga.e dinoñ meñ

maañ kī ḳhush-fahmī pe hans detī thī

ab ḳhud bhī to

umr kī girtī dīvāroñ se Tek lagā.e

fasl ḳhushī kī botī huuñ

aur ḳhush-fahmī kaaT rahī huuñ

jaane kaisī rasm hai ye bhī

maañ kyoñ beTī ko virse meñ

apnā muqaddar de detī hai

beTiyan bhi to maon jaisi hoti hain

zabt ke zard aanchal mein apne

sare dard chhupa leti hain

rote rote hans paDti hain

hanste hanste dil hi dil mein ro leti hain

KHushi ki KHwahish karte karte

KHwab aur KHak mein aT jati hain

sau hisson mein baT jati hain

ghar ke darwaze par baiThi

ummidon ke resham bunte sari umr ganwa

deti hain

main jo gae dinon mein

man ki KHush-fahmi pe hans deti thi

ab KHud bhi to

umr ki girti diwaron se Tek lagae

fasl KHushi ki boti hun

aur KHush-fahmi kaT rahi hun

jaane kaisi rasm hai ye bhi

man kyon beTi ko wirse mein

apna muqaddar de deti hai