wirsa

ye vatan terī mirī nasl kī jāgīr nahīñ

saiñkaḌoñ nasloñ kī mehnat ne sañvārā hai ise

kitne zehnoñ kā lahū kitnī nigāhoñ kā araq

kitne chehroñ kī hayā kitnī jabīnoñ kī shafaq

ḳhaak kī nazr huī tab ye nazāre bikhre

pattharoñ se ye tarāshe hue asnām-e-javāñ

ye sadāoñ ke ḳham-o-pech ye rañgoñ kī zabāñ

chimniyoñ se ye nikaltā huā pur-pech dhuāñ

terī taḳhlīq nahīñ hai mirī taḳhlīq nahīñ

ham agar zid bhī kareñ us pe to tasdīq nahīñ

ilm suulī pe chaḌhā tab kahīñ taḳhmīna banā

zahr sadiyoñ ne piyā tab kahīñ naushīna banā

saiñkaḌoñ paañv kaTe tab kahīñ ik ziina banā

tere qadmoñ ke tale yā mire qadmoñ ke tale

nau-e-insāñ ke shab-o-roz kī taqdīr nahīñ

ye vatan terī mirī nasl kī jāgīr nahīñ

saiñkaḌoñ nasloñ kī mehnat ne sañvārā hai ise

terā ġham kuchh bhī sahī merā alam kuchh bhī sahī

ahl-e-sarvat kī siyāsat kā sitam kuchh bhī sahī

kal kī nasleñ bhī koī chiiz haiñ ham kuchh bhī sahī

un kā virsa huuñ khañDar ye sitam ījād na kar

terī taḳhlīq nahīñ tū ise barbād na kar

jis se dahqān ko rozī nahīñ milne paatī

maiñ na dūñgā tujhe vo khet jalāne kā sabaq

fasl baaqī hai to taqsīm badal saktī hai

fasl kī ḳhaak se kyā māñgegā jamhūr kā haq

pal salāmat hai to tū paar utar saktā hai

chāhe tablīġh baġhāvat ke liye hī utre

varna 'ġhālib' kī zabāñ meñ mire hamdam mire dost

daam har mauj meñ hai halqa-e-sad-kām-e-nahañg

soch le phir koī ta.amīr girāne jaanā

terī ta.amīr se hai jañg ki taḳhrīb se jañg

ahal-e-mansab haiñ ġhalat-kār to un ke mansab

terī tā.īd se Dhāle ga.e to mujrim hai

merī tā.īd se Dhāle ga.e maiñ mujrim huuñ

paTriyāñ rail kī saḌkoñ kī baseñ phone ke taar

terī aur merī ḳhatāoñ kī sazā kyuuñ bugteñ

un pe kyuuñ zulm ho jin kī koī taqsīr nahīñ

ye vatan terī mirī nasl kī jāgīr nahīñ

saiñkaḌoñ nasloñ kī mehnat ne sañvārā hai ise

terā shikva bhī bajā merī shikāyat bhī durust

rañg-e-māhaul badalne kī zarūrat bhī durust

kaun kahtā hai ki hālāt pe tanqīd na kar

hukmarānoñ ke ġhalat da.avoñ kī tardīd na kar

tujh ko iz.hār-e-ḳhayālāt kā haq hāsil hai

aur ye haq koī tārīḳh kī ḳhairāt nahīñ

tere aur mere rafīqoñ ne lahū de de kar

zulm kī ḳhaak meñ is haq kā shajar boyā thā

sālhā-sāl meñ jo barg-o-samar laayā hai

apnā haq maañg magar un ke ta.āvun se na maañg

jo tire haq kā tasavvur hī fanā kar Dāleñ

haath uThā apne magar un ke jilau meñ na uThā

jo tire haath tire tan se judā kar Dāleñ

ḳhvāb-e-āzādī insāñ kī ye ta.abīr nahīñ

ye vatan terī mirī nasl kī jāgīr nahīñ

saiñkaḌoñ nasloñ kī mehnat ne sañvārā hai use

ye watan teri meri nasl ki jagir nahin

sainkaDon naslon ki mehnat ne sanwara hai ise

kitne zehnon ka lahu kitni nigahon ka araq

kitne chehron ki haya kitni jabinon ki shafaq

KHak ki nazr hui tab ye nazare bikhre

pattharon se ye tarashe hue asnam-e-jawan

ye sadaon ke KHam-o-pech ye rangon ki zaban

chimniyon se ye nikalta hua pur-pech dhuan

teri taKHliq nahin hai meri taKHliq nahin

hum agar zid bhi karen us pe to tasdiq nahin

ilm suli pe chaDha tab kahin taKHmina bana

zahr sadiyon ne piya tab kahin naushina bana

sainkaDon panw kaTe tab kahin ek zina bana

tere qadmon ke tale ya mere qadmon ke tale

nau-e-insan ke shab-o-roz ki taqdir nahin

ye watan teri meri nasl ki jagir nahin

sainkaDon naslon ki mehnat ne sanwara hai ise

tera gham kuchh bhi sahi mera alam kuchh bhi sahi

ahl-e-sarwat ki siyasat ka sitam kuchh bhi sahi

kal ki naslen bhi koi chiz hain hum kuchh bhi sahi

un ka wirsa hun khanDar ye sitam ijad na kar

teri taKHliq nahin tu ise barbaad na kar

jis se dahqan ko rozi nahin milne pati

main na dunga tujhe wo khet jalane ka sabaq

fasl baqi hai to taqsim badal sakti hai

fasl ki KHak se kya mangega jamhur ka haq

pal salamat hai to tu par utar sakta hai

chahe tabligh baghawat ke liye hi utre

warna 'ghaalib' ki zaban mein mere hamdam mere dost

dam har mauj mein hai halqa-e-sad-kaam-e-nahang

soch le phir koi tamir girane jaana

teri tamir se hai jang ki taKHrib se jang

ahal-e-mansab hain ghalat-kar to un ke mansab

teri taid se Dhaale gae to mujrim hai

meri taid se Dhaale gae main mujrim hun

paTriyan rail ki saDkon ki basen phone ke tar

teri aur meri KHataon ki saza kyun bugten

un pe kyun zulm ho jin ki koi taqsir nahin

ye watan teri meri nasl ki jagir nahin

sainkaDon naslon ki mehnat ne sanwara hai ise

tera shikwa bhi baja meri shikayat bhi durust

rang-e-mahaul badalne ki zarurat bhi durust

kaun kahta hai ki haalat pe tanqid na kar

hukmaranon ke ghalat dawon ki tardid na kar

tujh ko izhaar-e-KHayalat ka haq hasil hai

aur ye haq koi tariKH ki KHairaat nahin

tere aur mere rafiqon ne lahu de de kar

zulm ki KHak mein is haq ka shajar boya tha

salha-sal mein jo barg-o-samar laya hai

apna haq mang magar un ke taawun se na mang

jo tere haq ka tasawwur hi fana kar Dalen

hath uTha apne magar un ke jilau mein na uTha

jo tere hath tere tan se juda kar Dalen

KHwab-e-azadi insan ki ye tabir nahin

ye watan teri meri nasl ki jagir nahin

sainkaDon naslon ki mehnat ne sanwara hai use