wo baat

vo baat agar maiñ ḳhudā se kahtā

maiñ jāntā huuñ vo sun bhī letā

(javāb dene kī koī mī.ād tai nahīñ ho

to sirf sunñe meñ harj kyā hai)

maiñ māntā huuñ

javāb vo ek roz detā

pa ḳhvāhishoñ ne mirī samā.at ko mo'tabar hī kahāñ hai rakkhā

ye ḳhvāhisheñ haiñ ki mere kānoñ meñ ruuī sā kuchh nihāñ hai rakhā

maiñ sochtā huuñ

vo baat agar maiñ ḳhudā se kahtā

to maslahat kā shikār hotī

fuzūl be-e'tibār hotī

maiñ maslahat kā nahīñ muḳhālif

pa jāntā huuñ kisī bhī shai ke

har ek pahlū pe ġhaur hogā

to maslahat kā shikār hogī

talāsh-e-har-e'tibār be-e'tibār hogī

maiñ chāhtā huuñ

ki mashvara bhī karūñ kisī se

pe aql-e-insān

(aql-e-nsaqis)

har ek pahlū pe ġhaur

ḳhud ek maz.haka hai

yahāñ se aage jo marhala hai

vo fahm-e-insāñ se māvarā hai

ḳhayāl aatā hai akasr akasr

ḳhalīfatul-arz huuñ

isī sat.h par jo suljhā.ūñ baat ko maiñ

magar ḳhilāfat ko kyā vilāyat milī huī hai

mazīd ye kyā avaam o ashrāf kī himāyat milī huī hai

agar nahīñ to ye juzv-e-afkār kis liye hai

ye fikr-e-be-kār kis liye hai

vo baat yuuñ aham hai

ki mere vajūd meñ rūnumā huī hai

vajūd kī ik binā huī hai

vo baat mujh se judā nahīñ hai

vo baat sach hai vo mahz ik marhala nahīñ hai

vo baat maiñ huuñ

maiñ ḳhud ko zaa.e nahīñ karūñgā

wo baat agar main KHuda se kahta

main jaanta hun wo sun bhi leta

(jawab dene ki koi miad tai nahin ho

to sirf sunne mein harj kya hai)

main manta hun

jawab wo ek roz deta

pa KHwahishon ne meri samaat ko mo'tabar hi kahan hai rakkha

ye KHwahishen hain ki mere kanon mein rui sa kuchh nihan hai rakha

main sochta hun

wo baat agar main KHuda se kahta

to maslahat ka shikar hoti

fuzul be-e'tibar hoti

main maslahat ka nahin muKHalif

pa jaanta hun kisi bhi shai ke

har ek pahlu pe ghaur hoga

to maslahat ka shikar hogi

talash-e-har-e'tibar be-e'tibar hogi

main chahta hun

ki mashwara bhi karun kisi se

pe aql-e-insan

(aql-e-nsaqis)

har ek pahlu pe ghaur

KHud ek mazhaka hai

yahan se aage jo marhala hai

wo fahm-e-insan se mawara hai

KHayal aata hai akasr akasr

KHalifatul-arz hun

isi sath par jo suljhaun baat ko main

magar KHilafat ko kya wilayat mili hui hai

mazid ye kya awam o ashraf ki himayat mili hui hai

agar nahin to ye juzw-e-afkar kis liye hai

ye fikr-e-be-kar kis liye hai

wo baat yun aham hai

ki mere wajud mein runuma hui hai

wajud ki ek bina hui hai

wo baat mujh se juda nahin hai

wo baat sach hai wo mahz ek marhala nahin hai

wo baat main hun

main KHud ko zae nahin karunga