wo ek insan

vo ek insān manhanī sā

thā jo ba-zāhir

za.īf-o-lāġhar

badan ko khādī kī ek dhotī meñ vo chhupā.e

chhaḌī uThā.e

aur apnī ainak ke taar kānoñ meñ thā phañsā.e

baḌā hī chust aur mehnatī thā

bahut bahādur vo aadmī thā

vo ek insān manhanī sā

bahut bhalā thā

paḌhā likhā thā

huqūq insāñ ke jāntā thā

samān sab ko vo māntā thā

na muflisī aur māl-dārī kī us ko tafrīq thī gavārā

ḳhilāf vo farq-e-nasl-o-rañg ke

ka.ī baras tak rahā saf-ārā

vo apne hāthoñ meñ

sach ahinsā yaqīn azm-o-amal ke hathiyār le ke niklā

safed-fāmoñ se jañg karne

zamīn-e-hind un pe tañg karne

firañgiyoñ kā raqīb thā vo

ajiib thā vo

vo ek insān manhanī sā

dukhī diloñ kā thā jo sahārā

thā ahal-e-hindostāñ ko pyārā

vo shāntī kā payāmbar thā

vo saare bhārat kā rāhbar thā

wo ek insan manhani sa

tha jo ba-zahir

zaif-o-laghar

badan ko khadi ki ek dhoti mein wo chhupae

chhaDi uThae

aur apni ainak ke tar kanon mein tha phansae

baDa hi chust aur mehnati tha

bahut bahadur wo aadmi tha

wo ek insan manhani sa

bahut bhala tha

paDha likha tha

huquq insan ke jaanta tha

saman sab ko wo manta tha

na muflisi aur mal-dari ki us ko tafriq thi gawara

KHilaf wo farq-e-nasl-o-rang ke

kai baras tak raha saf-ara

wo apne hathon mein

sach ahinsa yaqin azm-o-amal ke hathiyar le ke nikla

safed-famon se jang karne

zamin-e-hind un pe tang karne

firangiyon ka raqib tha wo

ajib tha wo

wo ek insan manhani sa

dukhi dilon ka tha jo sahaara

tha ahal-e-hindostan ko pyara

wo shanti ka payambar tha

wo sare bhaarat ka rahbar tha