wo harf-o-saut-o-sada

vo harf jo fazā-e-nīlgūñ kī vus.atoñ meñ qaid thā

vo saut jo hisār-e-ḳhāmushī meñ jalva-rez thī

sadā jo kohsār kī bulandiyoñ pe mahv-e-ḳhvāb thī

ridā-e-barf se Dhakī

vo lafz jo fazā ke niile āñchaloñ se chhan ke

jazb ho rahā thā

reg-zār-e-vaqt meñ

jo zarra zarra muntashir thā

dhundlī dhundlī sā.atoñ kī gard meñ

vo ma.anī-e-gurez-pā

laraz rahā thā jo rag-e-hayāt meñ

vo ramz-e-muntazir ki jo abhī nihāñ thā

batn-e-kā.enāt meñ

vo harf-o-saut-o-sadā

vo lafz-e-muntashir

vo ramz-e-muntashir

vo ma.anī-e-gurez-pā

bas ek jast meñ

hisār-e-ḳhāmushī ko toḌ kar

pighal ke mere dard-o-ārzū kī aañch meñ

navā-o-nutq kī sabāhatoñ meñ Dhal gayā

vo ābshār-e-naġhma-o-navā

ki kohsār-e-sard se girā

ki gūñjtī guphāoñ se ubal paḌā

vo jū-e-zāt

naġhma-e-hayāt

jo ravāñ-davāñ hai bahr-e-be-karāñ kī khoj meñ

wo harf jo faza-e-nilgun ki wusaton mein qaid tha

wo saut jo hisar-e-KHamushi mein jalwa-rez thi

sada jo kohsar ki bulandiyon pe mahw-e-KHwab thi

rida-e-barf se Dhaki

wo lafz jo faza ke nile aanchalon se chhan ke

jazb ho raha tha

reg-zar-e-waqt mein

jo zarra zarra muntashir tha

dhundli dhundli saaton ki gard mein

wo mani-e-gurez-pa

laraz raha tha jo rag-e-hayat mein

wo ramz-e-muntazir ki jo abhi nihan tha

batn-e-kaenat mein

wo harf-o-saut-o-sada

wo lafz-e-muntashir

wo ramz-e-muntashir

wo mani-e-gurez-pa

bas ek jast mein

hisar-e-KHamushi ko toD kar

pighal ke mere dard-o-arzu ki aanch mein

nawa-o-nutq ki sabahaton mein Dhal gaya

wo aabshaar-e-naghma-o-nawa

ki kohsar-e-sard se gira

ki gunjti guphaon se ubal paDa

wo ju-e-zat

naghma-e-hayat

jo rawan-dawan hai bahr-e-be-karan ki khoj mein