wo ek sitara

vo ik sitāra

jo āsmāñ kī bulandiyoñ se utrā

ġhulām hindostāñ kī

muhīb tārīkiyoñ meñ chamkā

jis ne sākit fazāoñ ko irti.āsh baḳhshā

shu.ūr ko

bedāriyāñ atā kiiñ

aur

zamīr ko jhiñjhoḌā

be-fikr zehnoñ ko

fikr kī harārat se joḌā

diloñ meñ sham-e-āzādī-e-vatan jalā.ī

ki jis se

diloñ ke siyāh-ḳhāne munavvar hue

vo jāntā thā

ki

aahan aahan ko kāñTtā hai

vo askarī tāqatoñ se

jābir askariyyat ke istihkām ko

pāra-pāra kar ke

vatan ko āzād karne kā

ḳhvāb buntā rahā

vo azm aur hausle kī qindīl

apnī salīb-e-jāñ par

jalā ke

raushnī aur tamāzateñ bāñTtā rahā

vo jāntā thā

apne safar kī

ibtidā aur intihā kā hāsil

vo zehn kī

vus.atoñ meñ

is ummīd ke saath

azā.em ke biij botā rahā

ki

aane vaalī nasl

us fasl ko

kāmyābī aur kāmrānī se kaaT sake

wo ek sitara

jo aasman ki bulandiyon se utra

ghulam hindostan ki

muhib tarikiyon mein chamka

jis ne sakit fazaon ko irtiash baKHsha

shuur ko

bedariyan ata kin

aur

zamir ko jhinjhoDa

be-fikr zehnon ko

fikr ki hararat se joDa

dilon mein sham-e-azadi-e-watan jalai

ki jis se

dilon ke siyah-KHane munawwar hue

wo jaanta tha

ki

aahan aahan ko kanTta hai

wo askari taqaton se

jabir askariyyat ke istihkaam ko

para-para kar ke

watan ko aazad karne ka

KHwab bunta raha

wo azm aur hausle ki qindil

apni salib-e-jaan par

jala ke

raushni aur tamazaten banTta raha

wo jaanta tha

apne safar ki

ibtida aur intiha ka hasil

wo zehn ki

wusaton mein

is ummid ke sath

azaem ke bij bota raha

ki

aane wali nasl

us fasl ko

kaamyabi aur kaamrani se kaT sake