wo jo kahin nahin hai

terā koī din nahīñ

terā koī ruup nahīñ

abū-suifyān kī hiñda

is rañg-manch meñ

terī koī jagah nahīñ

ajdād ke intiqām meñ

tū kahāñ hai

nasloñ kī ḳhūn-āshām jañg meñ

tū jaltī rahī

kaleja chabāne se husain kā ḳhuun bahāne tak

zamīn-o-āsmān tujhe malāmat karte rahe

bad-baḳht-o-shikast-ḳhurda

hiñda bint-e-atba

terā qabīla terī vahshat se pahchānā gayā

terā pāgal-pan

terī vaj.h-e-shohrat hai

kisī faisle kisī raa.e meñ terā koī havāla nahīñ

tujhe vahshī banāne vaale tere adh mare aslāf

terī kokh zahr-ālūd kar ke

tujhe be vajūd kar ke

zamīn par musallat rahe aaseb ban kar

bad-baḳht hiñda

jo itnā shu.ūr tujhe hotā

to samajh paatī

jabrī nizām raa.ij karne ke liye

har baar kokh barbād kī ga.ī

tera koi din nahin

tera koi rup nahin

abu-suifyan ki hinda

is rang-manch mein

teri koi jagah nahin

ajdad ke intiqam mein

tu kahan hai

naslon ki KHun-asham jang mein

tu jalti rahi

kaleja chabane se husain ka KHun bahane tak

zamin-o-asman tujhe malamat karte rahe

bad-baKHt-o-shikast-KHurda

hinda bint-e-atba

tera qabila teri wahshat se pahchana gaya

tera pagal-pan

teri wajh-e-shohrat hai

kisi faisle kisi rae mein tera koi hawala nahin

tujhe wahshi banane wale tere adh mare aslaf

teri kokh zahr-alud kar ke

tujhe be wajud kar ke

zamin par musallat rahe aaseb ban kar

bad-baKHt hinda

jo itna shuur tujhe hota

to samajh pati

jabri nizam raij karne ke liye

har bar kokh barbaad ki gai