wo pal

agar vo pal mujhe ik baar mil jaa.e to maiñ pūchhūñ

ki ye saudā mire sar meñ samāyā kis liye tū ne

ye dard-e-lā-davā dil meñ jagāyā kis liye tū ne

ḳhirad idrāk aql-o-fahm sab begār hoñ jaise

farāsat dūr-bīnī āgahī bekār hoñ jaise

havāle isti.āre mashvare dushvār hoñ jaise

dalā.el falsafe mantiq zehn par baar hoñ jaise

basīrat hoshiyārī ilm sab ḳhāmosh tasvīreñ

na koī mashvara achchhā na dānish-mand tadbīreñ

musalsal be-kalī dīvāngī hai ḳhud-farāmoshī

faqat ik be-ḳhudī āThoñ pahar pur-kaif mad-hoshī

nazar har shakl meñ DhūñDe usī dildār kī sūrat

har ik āvāz jaise sāhab-e-āvāz kī mūrat

samā.at par nazar par soch par aaseb chhāyā hai

har aahaT par tamannā pūchhtī hai kaun aayā hai

agar wo pal mujhe ek bar mil jae to main puchhun

ki ye sauda mere sar mein samaya kis liye tu ne

ye dard-e-la-dawa dil mein jagaya kis liye tu ne

KHirad idrak aql-o-fahm sab begar hon jaise

farasat dur-bini aagahi bekar hon jaise

hawale istiare mashware dushwar hon jaise

dalael falsafe mantiq zehn par bar hon jaise

basirat hoshiyari ilm sab KHamosh taswiren

na koi mashwara achchha na danish-mand tadbiren

musalsal be-kali diwangi hai KHud-faramoshi

faqat ek be-KHudi aaThon pahar pur-kaif mad-hoshi

nazar har shakl mein DhunDe usi dildar ki surat

har ek aawaz jaise sahab-e-awaz ki murat

samaat par nazar par soch par aaseb chhaya hai

har aahaT par tamanna puchhti hai kaun aaya hai