wo samajhte rahen england ka mal achchha hai

sarfaroshān-e-vatan kā ye ḳhayāl achchhā hai

hind ke vāste marne kā ma.aal achchhā hai

jazba-e-hubb-e-vatan ho na agar dil meñ nihāñ

aise jiine se to marne kā ḳhayāl achchhā hai

zarra-e-ḳhāk-e-vatan mehr-e-daraḳhshāñ hai mujhe

vo samajhte raheñ england kā maal achchhā hai

jāñ-ba-lab hai sitam-ījād ke hāthoñ se vatan

kaun kahtā hai mire hind kā haal achchhā hai

un ko paris ke nazāroñ pe fidā hone do

mujh ko bhārat ke liye rañj-o-malāl achchhā hai

karne detā nahīñ jallād zabāñ se uf tak

dil meñ kahtā hai ġharīboñ kā savāl achchhā hai

lājpat-rā.e kī shamshān se aatī hai sadā

mulk kī raah meñ miTne kā ḳhayāl achchhā hai

apne matlab ke liye mulk kā dushman jo bane

aise kambaḳht kā duniyā meñ zavāl achchhā hai

zar ke thāloñ meñ mutton chaap uḌāne do unheñ

ham ġharīboñ ko magar jām-e-sifāl achchhā hai

'āftāb' aaj phañsā jaatā hai phir tā.ir-e-dil

haa.e afsos ki sayyād kā jaal achchhā hai

sarfaroshan-e-watan ka ye KHayal achchha hai

hind ke waste marne ka maal achchha hai

jazba-e-hubb-e-watan ho na agar dil mein nihan

aise jine se to marne ka KHayal achchha hai

zarra-e-KHak-e-watan mehr-e-daraKHshan hai mujhe

wo samajhte rahen england ka mal achchha hai

jaan-ba-lab hai sitam-ijad ke hathon se watan

kaun kahta hai mere hind ka haal achchha hai

un ko paris ke nazaron pe fida hone do

mujh ko bhaarat ke liye ranj-o-malal achchha hai

karne deta nahin jallad zaban se uf tak

dil mein kahta hai gharibon ka sawal achchha hai

lajpat-rae ki shamshan se aati hai sada

mulk ki rah mein miTne ka KHayal achchha hai

apne matlab ke liye mulk ka dushman jo bane

aise kambaKHt ka duniya mein zawal achchha hai

zar ke thaalon mein mutton chap uDane do unhen

hum gharibon ko magar jam-e-sifal achchha hai

'aftab' aaj phansa jata hai phir tair-e-dil

hae afsos ki sayyaad ka jal achchha hai