wo shahr ab bhi usi jagah hai

vo shahr ab bhī usī jagah hai

vo sard retīle rāste

aaj bhī unhī vādiyoñ kī jānib ravāñ-davāñ haiñ

jahāñ ghane jhunD haiñ daraḳhtoñ ke

shāḳh-sāroñ meñ chahchahāte hue parindoñ kī Toliyāñ haiñ

jahāñ pahāḌoñ kī surma.ī choTiyoñ par āvāra bādaloñ ne

nasheman apne banā rakhe haiñ

nadī ke paanī meñ

sabz parchhā.iyoñ kī pariyoñ kā hai baserā

sharīr jhoñke havā ke jin kā sajal badan gudgudā rahe haiñ

fazā meñ vo tāzgī-o-tābindagī jahāñ muskurā rahī hai

huā ho sadiyoñ ke baa'd jaise zamīñ pe pahle-pahal saverā

kiyā ho sūraj ne jaise sadiyoñ ke baa'd us ḳhāk-dāñ kā pherā

vo shahr ab bhī usī jagah hai

vo saare manzar abhī unhīñ chaukhaToñ meñ jaise jaḌe hue haiñ

ga.e zamāne bhī jaise āñkhoñ ke sāmne aa khaḌe hue haiñ

vahī gulābī sī dhuup dīvār-o-dar ko rangīñ banā rahī hai

khulī chhatoñ par

vahī ru-pahlī sī chāñdnī giit gā rahī hai

kushāda dil āñganoñ meñ ab bhī

nashāt-e-ehsās ke shagūfe chaTak rahe haiñ

kahīñ sajī hai ḳhud apne hī sā.ebāñ ke nīche

qarār-e-qalb-o-nazar kī mahfil

kahīñ paḌosī ke ghar kā naġhma sukūñ kī sauġhāt bāñTtā hai

kahīñ jharokoñ se jhāñktā hai kisī kā pindār-e-ḳhud-numā.ī

kahīñ muñDereñ phalāñgtā hai kisī kā ehsās-e-nā-rasā.ī

vahī jharoke vahī muñDereñ buland-o-bālā vahī manāre

aur un manaroñ pe par sukhāte

kabūtarān-e-haram vahī haiñ

azaañ kī āvāz sun ke masjid kī samt uThte qadam vahī haiñ

abhī vahī āsmān un kī zamīñ pe saaya kiye hue hai

abhī vahāñ apne nek bandoñ kī qismatoñ kī

ḳhudā zamānat liye hue hai

vo shahr ab bhī usī jagah hai

vo log ab bhī usī tarah

ek dūsre ke ġhamoñ se vāqif masarratoñ se bhī bā-ḳhabar haiñ

vo āshnā manziloñ ke raahī haiñ

jāda-e-shab pe sadiyoñ se ham-safar haiñ

vo jānte haiñ

ki is shab-o-roz kī masāfat kā mudda'ā kyā ma.aal kyā hai

vo jānte haiñ

ki kaun kis marhale pe kyā sochtā hai

kis kā ḳhayāl kyā hai

vo ḳhud ko pahchānte haiñ

apnī hadoñ ko bhī jānte haiñ

apnī hadoñ meñ rah kar hī jī rahe haiñ

janam janam se sukhī rahe haiñ

kabhī vo mujh se bhī āshnā the mujhe bhī pahchānte the lekin

maiñ ek lambe safar pe niklā

dahaktī lohe kī paTriyāñ mere aage pīchhe rahīñ lapaktī bahut dinoñ tak

aur aaj barsoñ ke baa'd lauTā to maiñ ne dekhā

maiñ vo nahīñ huuñ

jise vo sab alvidāa' kahte hue kisī roz ro paḌe the

maiñ vo nahīñ huuñ

jo un se ruḳhsat ke vaqt shāyad udaas bhī thā malūl bhī thā

maiñ un se kahtā huuñ maiñ vahī huuñ

to merī āvāz ḳhud mujhe ajnabī sī lagtī hai

jaise kahtā ho koī tum jhuuT bolte ho

to kyā ye sach hai ki do-ruḳhī mujh meñ aa ga.ī hai

vo shahr ab bhī usī jagah hai

vo sard retīle rāste

aaj bhī unhī vādiyoñ kī jānib ravāñ-davāñ haiñ

vo saare manzar abhī unhī chaukhaToñ meñ jaise jaḌe hue haiñ

vo log ab bhī usī tarah

ek dūsre ke ġhamoñ se vāqif

masarratoñ se bhī bā-ḳhabar haiñ

magar ab un meñ mujhe koī jāntā nahīñ hai

maiñ duur kā ajnabī musāfir nahīñ koī māntā nahīñ hai

wo shahr ab bhi usi jagah hai

wo sard retile raste

aaj bhi unhi wadiyon ki jaanib rawan-dawan hain

jahan ghane jhunD hain daraKHton ke

shaKH-saron mein chahchahate hue parindon ki Toliyan hain

jahan pahaDon ki surmai choTiyon par aawara baadalon ne

nasheman apne bana rakhe hain

nadi ke pani mein

sabz parchhaiyon ki pariyon ka hai basera

sharir jhonke hawa ke jin ka sajal badan gudguda rahe hain

faza mein wo tazgi-o-tabindagi jahan muskura rahi hai

hua ho sadiyon ke ba'd jaise zamin pe pahle-pahal sawera

kiya ho suraj ne jaise sadiyon ke ba'd us KHak-dan ka phera

wo shahr ab bhi usi jagah hai

wo sare manzar abhi unhin chaukhaTon mein jaise jaDe hue hain

gae zamane bhi jaise aankhon ke samne aa khaDe hue hain

wahi gulabi si dhup diwar-o-dar ko rangin bana rahi hai

khuli chhaton par

wahi ru-pahli si chandni git ga rahi hai

kushada dil aanganon mein ab bhi

nashat-e-ehsas ke shagufe chaTak rahe hain

kahin saji hai KHud apne hi saeban ke niche

qarar-e-qalb-o-nazar ki mahfil

kahin paDosi ke ghar ka naghma sukun ki saughat banTta hai

kahin jharokon se jhankta hai kisi ka pindar-e-KHud-numai

kahin munDeren phalangta hai kisi ka ehsas-e-na-rasai

wahi jharoke wahi munDeren buland-o-baala wahi manare

aur un manaron pe par sukhate

kabutaran-e-haram wahi hain

azan ki aawaz sun ke masjid ki samt uThte qadam wahi hain

abhi wahi aasman un ki zamin pe saya kiye hue hai

abhi wahan apne nek bandon ki qismaton ki

KHuda zamanat liye hue hai

wo shahr ab bhi usi jagah hai

wo log ab bhi usi tarah

ek dusre ke ghamon se waqif masarraton se bhi ba-KHabar hain

wo aashna manzilon ke rahi hain

jada-e-shab pe sadiyon se ham-safar hain

wo jaante hain

ki is shab-o-roz ki masafat ka mudda'a kya maal kya hai

wo jaante hain

ki kaun kis marhale pe kya sochta hai

kis ka KHayal kya hai

wo KHud ko pahchante hain

apni hadon ko bhi jaante hain

apni hadon mein rah kar hi ji rahe hain

janam janam se sukhi rahe hain

kabhi wo mujh se bhi aashna the mujhe bhi pahchante the lekin

main ek lambe safar pe nikla

dahakti lohe ki paTriyan mere aage pichhe rahin lapakti bahut dinon tak

aur aaj barson ke ba'd lauTa to main ne dekha

main wo nahin hun

jise wo sab alwidaa' kahte hue kisi roz ro paDe the

main wo nahin hun

jo un se ruKHsat ke waqt shayad udas bhi tha malul bhi tha

main un se kahta hun main wahi hun

to meri aawaz KHud mujhe ajnabi si lagti hai

jaise kahta ho koi tum jhuT bolte ho

to kya ye sach hai ki do-ruKHi mujh mein aa gai hai

wo shahr ab bhi usi jagah hai

wo sard retile raste

aaj bhi unhi wadiyon ki jaanib rawan-dawan hain

wo sare manzar abhi unhi chaukhaTon mein jaise jaDe hue hain

wo log ab bhi usi tarah

ek dusre ke ghamon se waqif

masarraton se bhi ba-KHabar hain

magar ab un mein mujhe koi jaanta nahin hai

main dur ka ajnabi musafir nahin koi manta nahin hai