working lady

maiñ jab bhī ghar pe aatī huuñ

bahut sī chīzeñ laatī huuñ

aur un chīzoñ meñ akasr

ḳhud ko rakh kar bhuul jaatī huuñ

patā us vaqt chaltā hai

ki jab takiye pe rakhne ko

mujhe sar hī nahīñ miltā

mayassar ḳhvāb kaise hoñ

ki āñkheñ hī nahīñ hotīñ

thakan se chuur hāthoñ kī

maiñ jab jab siskiyāñ suntī huuñ

apnī kirchiyāñ chuntī huuñ

pahlū meñ kahīñ dil bhī nahīñ miltā

mujhe bas paañv milte haiñ jo paañv paañv chalte

mujhe le jaate haiñ ik aise kamre meñ

jahāñ par koī merā jism oḌhe so rahā hai

ye kis ne sūiyāñ sī ruuh meñ merī chubho dī haiñ

maiñ ḳhud ko toḌ detī huuñ vahīñ par chhoḌ detī huuñ

so bas chup chaap ghar kī sīḌhiyoñ par baiTh jaatī huuñ

havā.eñ bain kartīñ jab barābar se guzartī haiñ

pakaḌ kar haath un kā paas hī apne biThātī huuñ

na.e kuchh diip raushan kar ke ḳhud bhī muskurātī huuñ

zarā sī ek aurat huuñ

diyoñ kī lau meñ lekin jagmagātī huuñ

main jab bhi ghar pe aati hun

bahut si chizen lati hun

aur un chizon mein akasr

KHud ko rakh kar bhul jati hun

pata us waqt chalta hai

ki jab takiye pe rakhne ko

mujhe sar hi nahin milta

mayassar KHwab kaise hon

ki aankhen hi nahin hotin

thakan se chur hathon ki

main jab jab siskiyan sunti hun

apni kirchiyan chunti hun

pahlu mein kahin dil bhi nahin milta

mujhe bas panw milte hain jo panw panw chalte

mujhe le jate hain ek aise kamre mein

jahan par koi mera jism oDhe so raha hai

ye kis ne suiyan si ruh mein meri chubho di hain

main KHud ko toD deti hun wahin par chhoD deti hun

so bas chup chap ghar ki siDhiyon par baiTh jati hun

hawaen bain kartin jab barabar se guzarti hain

pakaD kar hath un ka pas hi apne biThati hun

nae kuchh dip raushan kar ke KHud bhi muskuraati hun

zara si ek aurat hun

diyon ki lau mein lekin jagmagati hun