world-bank

chalo aao

ham apne bank ke

baḌhte asāsoñ ke tanāsub se

na.ī building banā.eñ

aur is ta.amīr meñ

ham vo visā.el kaam meñ laa.eñ

jo pas-māñda mumālik ke

sabhī nādār jismoñ meñ

zaḳhīra haiñ

chalo aao

ham in jismoñ kī saarī haDDiyoñ ko

ḳhuub kūTeñ

phir in ko piis ke gaarā banā.eñ

ham in ke gosh ke TukḌe jalā kar

plastar bhī banā.eñ aur Dāmar bhī

magar saare amal meñ

vo ta.affun kam se kam ho jo

kisī bhī chiiz ke jalne se chou-tarfā

fazā meñ phuuT paḌtā hai

chalo aao

ham in jismoñ se

ek ik rag bhī khīñcheñ

aur ragoñ ko wiring ke kaam meñ laa.eñ

phir in jismoñ ke sab a.azā nichoḌeñ

aur lahū se is imārat kā

chamaktā rañg aur roġhan banā.eñ

imārat jab mukammal ho chuke to

inhīñ jismoñ se kuchh ke maġhz le kar

inheñ sarmā.e kī hiddat se pighlā.eñ

asāse aur baḌh jaa.eñ

chalo aao

hum apne bank ke

baDhte asason ke tanasub se

nai building banaen

aur is tamir mein

hum wo wisael kaam mein laen

jo pas-manda mumalik ke

sabhi nadar jismon mein

zaKHira hain

chalo aao

hum in jismon ki sari haDDiyon ko

KHub kuTen

phir in ko pis ke gara banaen

hum in ke gosh ke TukDe jala kar

plastar bhi banaen aur Damar bhi

magar sare amal mein

wo taffun kam se kam ho jo

kisi bhi chiz ke jalne se chou-tarfa

faza mein phuT paDta hai

chalo aao

hum in jismon se

ek ek rag bhi khinchen

aur ragon ko wiring ke kaam mein laen

phir in jismon ke sab aaza nichoDen

aur lahu se is imarat ka

chamakta rang aur roghan banaen

imarat jab mukammal ho chuke to

inhin jismon se kuchh ke maghz le kar

inhen sarmae ki hiddat se pighlaen

asase aur baDh jaen