ya KHuda

saare afkār-o-aqā.ed ke tilism

saare asnām-e-ḳhayāl

ham ne vo but-shikanī kī hai ki mismār haiñ sab

apne ghar baar kī mahfūz fasīleñ ham ne

yuuñ girā.ī haiñ ki ab

dūr-o-nazdīk kī har tund havā

sab charāġhoñ ko bas ik phūñk meñ gul kar jaa.e

ham ki har silsila-o-qaid kī zanjīr se āzād hue

aise majlis ke makīñ haiñ ki jahāñ

koī darvāza koī rauzan-e-dīvār nahīñ

yā ḳhudā

koī ġham aisā ki har ġham ko subuksār kare

koī aag aisī ki har aag ko ḳhāshāk kare

koī mafhūm koī naqsh-e-tamannā ki jise

apne dil-o-jāñ kā lahū nazr karūñ

surḳh-rū ho ke kahūñ

ziist kī ye mohlat do-ek nafas

itnī be-rang na thī

itnī faromāya na thī

sare afkar-o-aqaed ke tilism

sare asnam-e-KHayal

hum ne wo but-shikani ki hai ki mismar hain sab

apne ghar bar ki mahfuz fasilen hum ne

yun girai hain ki ab

dur-o-nazdik ki har tund hawa

sab charaghon ko bas ek phunk mein gul kar jae

hum ki har silsila-o-qaid ki zanjir se aazad hue

aise majlis ke makin hain ki jahan

koi darwaza koi rauzan-e-diwar nahin

ya KHuda

koi gham aisa ki har gham ko subuksar kare

koi aag aisi ki har aag ko KHashak kare

koi mafhum koi naqsh-e-tamanna ki jise

apne dil-o-jaan ka lahu nazr karun

surKH-ru ho ke kahun

zist ki ye mohlat do-ek nafas

itni be-rang na thi

itni faromaya na thi