yaad-e-aligarh

vo chaa.e kī pyālī pe yāroñ ke jalse

vo sardī kī rāteñ vo zulfoñ ke qisse

kabhī tazkire husn-e-sho.ala-ruḳhāñ ke

mohabbat huī thī kisī ko kisī se

har ik dil vahāñ thā nazar kā nishāna

bahut yaad aatā hai guzrā zamāna

bahut apnā andāz thā lā-ubālī

kabhī the jalālī kabhī the jamālī

kabhī baat meñ baat yūñhī nikālī

sar-e-rāh koī qayāmat uThā lī

kisī ko laḌānā kisī ko bachānā

bahut yaad aatā hai guzrā zamāna

kabhī sachchī bātoñ ko jhūTā batāyā

kabhī jhūTī bātoñ ko sach kar dikhāyā

kabhī rāz-e-dil kah ke us ko chhupāyā

kabhī dostoñ meñ yūñhī kuchh uḌāyā

batā kar chhupānā chhupā kar batānā

bahut yaad aatā hai guzrā zamāna

kabhī bazm-e-ahbāb meñ sho.ala-afshāñ

kabhī union meñ the shamshīr-e-burrāñ

kabhī bazm-e-vā.iz meñ the pā-ba-jaulāñ

badalte the har roz taqdīr-e-daurāñ

jahāñ jaisī Daflī vahāñ vaisā gaanā

bahut yaad aatā hai guzrā zamāna

zamāna thā vo ek haivāniyat kā

vo daur-e-malāmat thā shaitāniyat kā

hameñ dard thā ek insāniyat kā

uThā.e alam ham the haqqāniyat kā

baḌhe jā rahe the magar bāġhiyāna

bahut yaad aatā hai guzrā zamāna

muqābil meñ aa.e jasārat thī kis ko

koī rok de baḌh ke himmat thī kis ko

pukāre koī ham ko tāqat thī kis ko

ki har bul-havas ko the ham tāziyāna

bahut yaad aatā hai guzrā zamāna

ḳhayālāt-e-pur-shauq kā silsila thā

badal deñ zamāne ko vo hausla thā

har ik dil meñ paidā nayā valvala thā

har ik gaam ahbāb kā qāfila thā

idhar da.avā karnā udhar kar dikhānā

bahut yaad aatā hai guzrā zamāna

vo shah-rāh-e-marrice ke pur-pech chakkar

vo shamshād building pe ik shor-e-mahshar

vo mub.ham sī bāteñ vo poshīda nashtar

vo be-fikr duniyā vo lafzoñ ke daftar

ki jin kā sirā thā na koī Thikāna

bahut yaad aatā hai guzrā zamāna

kisī ko huī thī kisī se mohabbat

koī kar rahā thā kisī kī shikāyat

ġharaz roz Dhātī thī taaza qayāmat

kisī kī shabāhat kisī kī malāmat

kisī kī tasallī kisī kā satānā

bahut yaad aatā hai guzrā zamāna

koī ġham-zada thā koī hañs rahā thā

koī husn-e-nāhīd par mar miTā thā

koī chashm-e-nargis kā bīmār sā thā

koī bas yūñhī tāktā jhāñktā thā

kabhī choT khānā kabhī muskurānā

bahut yaad aatā hai guzrā zamāna

vo har january meñ numā.ish ke charche

vo pur-shauq āñkheñ vo hairān jalve

vo chakkar pe chakkar the bāra-darī ke

vo hasrat ki sau baar mil kar bhī milte

hazāroñ bahānoñ kā vo ik bahānā

bahut yaad aatā hai guzrā zamāna

vo ruḳh āftābī pe abrū hilālī

vo timsāl-e-sīmīñ vo husn-misālī

shagūfoñ meñ khelī gulāboñ meñ paalī

vo ḳhud ik adā thī adā bhī nirālī

nigāheñ bachā kar nigāheñ milā kar

bahut yaad aatā hai guzrā zamāna

vo har-chand mujh ko nahīñ jāntī thī

magar merī nazroñ ko pahchāntī thī

agarche mire dil meñ vo bas ga.ī thī

magar baat bas dil kī dil meñ rahī thī

magar aaj ahbāb se kyā chhupānā

bahut yaad aatā hai guzrā zamāna

vo ik shaam barsāt kī din Dhalā thā

abhī raat aa.ī na thī jhuTpuTā thā

vo bād-e-bahārī se ik gul khilā thā

dhaḌakte hue dil se ik dil milā thā

nazar sun rahī thī nazar kā fasāna

bahut yaad aatā hai guzrā zamāna

javānī adāoñ meñ bal khā rahī thī

kahānī nigāhoñ meñ lahrā rahī thī

mohabbat mohabbat ko samjhā rahī thī

vo chashm-e-tamannā jhukī jā rahī thī

qayāmat se pahle qayāmat vo Dhānā

bahut yaad aatā hai guzrā zamāna

hameñ biitī bāteñ jo yaad aa rahī thiiñ

vo maḳhmūr nazreñ jo sharmā rahī thiiñ

bahut aql-e-sāda ko bahkā rahī thiiñ

baḌī be-niyāzī se farmā rahī thiiñ

unheñ yaad rakhnā hameñ bhuul jaanā

bahut yaad aatā hai guzrā zamāna

ab vo umañgeñ na dil meñ murādeñ

ab rah ga.iiñ chand maazī kī yādeñ

ye jī chāhtā hai unheñ bhī bhalā deñ

ġham-e-zindagī ko kahāñ tak duā deñ

haqīqat bhī ab ban ga.ī hai fasāna

bahut yaad aatā hai guzrā zamāna

aligarh hai baḌh kar hameñ kul jahāñ se

hameñ ishq hai apnī urdu zabāñ se

hameñ pyaar hai apne nām-o-nishāñ se

yahāñ aa ga.e ham na jaane kahāñ se

qasam de ke ham ko kasī kā bulānā

bahut yaad aatā hai guzrā zamāna

mohabbat se yaksar hai anjān duniyā

ye vīrān bastī pareshān duniyā

kamāl-e-ḳhirad se ye hairān duniyā

ḳhud apne kiye par pashemān duniyā

kahāñ le ke aayā hameñ āb-o-dāna

bahut yaad aatā hai guzrā zamāna

wo chae ki pyali pe yaron ke jalse

wo sardi ki raaten wo zulfon ke qisse

kabhi tazkire husn-e-shoala-ruKHan ke

mohabbat hui thi kisi ko kisi se

har ek dil wahan tha nazar ka nishana

bahut yaad aata hai guzra zamana

bahut apna andaz tha la-ubaali

kabhi the jalali kabhi the jamali

kabhi baat mein baat yunhi nikali

sar-e-rah koi qayamat uTha li

kisi ko laDana kisi ko bachana

bahut yaad aata hai guzra zamana

kabhi sachchi baaton ko jhuTa bataya

kabhi jhuTi baaton ko sach kar dikhaya

kabhi raaz-e-dil kah ke us ko chhupaya

kabhi doston mein yunhi kuchh uDaya

bata kar chhupana chhupa kar batana

bahut yaad aata hai guzra zamana

kabhi bazm-e-ahbab mein shoala-afshan

kabhi union mein the shamshir-e-burran

kabhi bazm-e-waiz mein the pa-ba-jaulan

badalte the har roz taqdir-e-dauran

jahan jaisi Dafli wahan waisa gana

bahut yaad aata hai guzra zamana

zamana tha wo ek haiwaniyat ka

wo daur-e-malamat tha shaitaniyat ka

hamein dard tha ek insaniyat ka

uThae alam hum the haqqaniyat ka

baDhe ja rahe the magar baghiyana

bahut yaad aata hai guzra zamana

muqabil mein aae jasarat thi kis ko

koi rok de baDh ke himmat thi kis ko

pukare koi hum ko taqat thi kis ko

ki har bul-hawas ko the hum taziyana

bahut yaad aata hai guzra zamana

KHayalat-e-pur-shauq ka silsila tha

badal den zamane ko wo hausla tha

har ek dil mein paida naya walwala tha

har ek gam ahbab ka qafila tha

idhar dawa karna udhar kar dikhana

bahut yaad aata hai guzra zamana

wo shah-rah-e-marrice ke pur-pech chakkar

wo shamshad building pe ek shor-e-mahshar

wo mubham si baaten wo poshida nashtar

wo be-fikr duniya wo lafzon ke daftar

ki jin ka sira tha na koi Thikana

bahut yaad aata hai guzra zamana

kisi ko hui thi kisi se mohabbat

koi kar raha tha kisi ki shikayat

gharaz roz Dhati thi taza qayamat

kisi ki shabahat kisi ki malamat

kisi ki tasalli kisi ka satana

bahut yaad aata hai guzra zamana

koi gham-zada tha koi hans raha tha

koi husn-e-nahid par mar miTa tha

koi chashm-e-nargis ka bimar sa tha

koi bas yunhi takta jhankta tha

kabhi choT khana kabhi muskurana

bahut yaad aata hai guzra zamana

wo har january mein numaish ke charche

wo pur-shauq aankhen wo hairan jalwe

wo chakkar pe chakkar the bara-dari ke

wo hasrat ki sau bar mil kar bhi milte

hazaron bahanon ka wo ek bahana

bahut yaad aata hai guzra zamana

wo ruKH aaftabi pe abru hilali

wo timsal-e-simin wo husn-misali

shagufon mein kheli gulabon mein pali

wo KHud ek ada thi ada bhi nirali

nigahen bacha kar nigahen mila kar

bahut yaad aata hai guzra zamana

wo har-chand mujh ko nahin jaanti thi

magar meri nazron ko pahchanti thi

agarche mere dil mein wo bas gai thi

magar baat bas dil ki dil mein rahi thi

magar aaj ahbab se kya chhupana

bahut yaad aata hai guzra zamana

wo ek sham barsat ki din Dhala tha

abhi raat aai na thi jhuTpuTa tha

wo baad-e-bahaari se ek gul khila tha

dhaDakte hue dil se ek dil mila tha

nazar sun rahi thi nazar ka fasana

bahut yaad aata hai guzra zamana

jawani adaon mein bal kha rahi thi

kahani nigahon mein lahra rahi thi

mohabbat mohabbat ko samjha rahi thi

wo chashm-e-tamanna jhuki ja rahi thi

qayamat se pahle qayamat wo Dhana

bahut yaad aata hai guzra zamana

hamein biti baaten jo yaad aa rahi thin

wo maKHmur nazren jo sharma rahi thin

bahut aql-e-sada ko bahka rahi thin

baDi be-niyazi se farma rahi thin

unhen yaad rakhna hamein bhul jaana

bahut yaad aata hai guzra zamana

ab wo umangen na dil mein muraden

ab rah gain chand mazi ki yaaden

ye ji chahta hai unhen bhi bhala den

gham-e-zindagi ko kahan tak dua den

haqiqat bhi ab ban gai hai fasana

bahut yaad aata hai guzra zamana

aligarh hai baDh kar hamein kul jahan se

hamein ishq hai apni urdu zaban se

hamein pyar hai apne nam-o-nishan se

yahan aa gae hum na jaane kahan se

qasam de ke hum ko kasi ka bulana

bahut yaad aata hai guzra zamana

mohabbat se yaksar hai anjaan duniya

ye viran basti pareshan duniya

kamal-e-KHirad se ye hairan duniya

KHud apne kiye par pasheman duniya

kahan le ke aaya hamein aab-o-dana

bahut yaad aata hai guzra zamana