yaad hai

kheltā thā jab laḌakpan se tirā rañgīñ shabāb

haT rahī thī māh-e-ālam-tāb ke ruḳh se naqqāb

zindagī thī husn-e-nau āġhāz kā rañgīn ḳhvāb

yaad hai vo naujavānī kā zamāna yaad hai

jab ki sāz-e-zindagī naġhmāt se ma.amūr thā

zarra zarra mere dil kī ḳhaak kā jab tuur thā

maiñ akelā hī nahīñ saarā jahāñ masrūr thā

yaad hai vo naujavānī kā zamāna yaad hai

kheltī thī naujavānī jab ki bāñhoñ meñ tirī

zindagī kī bārisheñ thiiñ jalva-gāhoñ meñ tirī

raqs kartī thiiñ tamannā.eñ nigāhoñ meñ tirī

yaad hai vo naujavānī kā zamāna yaad hai

har adā-e-husn par hotā thā dil jab be-qarār

jab rahā kartā mulāqātoñ kā bāham intizār

jab tabī.at tujh se milnā chāhtī thī baar baar

yaad hai vo naujavānī kā zamāna yaad hai

raat bhar sone na detī thī masarrat iid kī

jabki rahtī thī diloñ meñ be-qarārī diid kī

māhtāb-e-īd bin jaatī kiran ḳhurshīd kī

yaad hai vo naujavānī kā zamāna yaad hai

raat aatī thī sunāne soz kā paiġhām jab

mashq-e-tahrīr-e-junūñ bantā thā terā naam jab

thā na kuchh pesh-e-nazar is ishq kā anjām jab

yaad hai vo naujavānī kā zamāna yaad hai

khelta tha jab laDakpan se tera rangin shabab

haT rahi thi mah-e-alam-tab ke ruKH se naqqab

zindagi thi husn-e-nau aaghaz ka rangin KHwab

yaad hai wo naujawani ka zamana yaad hai

jab ki saz-e-zindagi naghmat se mamur tha

zarra zarra mere dil ki KHak ka jab tur tha

main akela hi nahin sara jahan masrur tha

yaad hai wo naujawani ka zamana yaad hai

khelti thi naujawani jab ki banhon mein teri

zindagi ki barishen thin jalwa-gahon mein teri

raqs karti thin tamannaen nigahon mein teri

yaad hai wo naujawani ka zamana yaad hai

har ada-e-husn par hota tha dil jab be-qarar

jab raha karta mulaqaton ka baham intizar

jab tabiat tujh se milna chahti thi bar bar

yaad hai wo naujawani ka zamana yaad hai

raat bhar sone na deti thi masarrat id ki

jabki rahti thi dilon mein be-qarari did ki

mahtab-e-id bin jati kiran KHurshid ki

yaad hai wo naujawani ka zamana yaad hai

raat aati thi sunane soz ka paigham jab

mashq-e-tahrir-e-junun banta tha tera nam jab

tha na kuchh pesh-e-nazar is ishq ka anjam jab

yaad hai wo naujawani ka zamana yaad hai