yaad ke dariche

idhar tere kūche se merā guzar

bahāne se vo terā le jaanā ghar

zamāna laḌakpan kā rangīn thā

ki tū sher-o-naġhme kā shauqīn thā

baḌī der tak silsila-e-suḳhan

mirī shaḳhsiyat merā andāz-e-fan

sarāhā kiyā tū jo ash.ār ko

tashaffī huī tere fankār ko

yahīñ se juḌā silsila-e-hayāt

badal sī ga.ī thī mirī kā.enāt

ajab dard siine meñ paltā rahā

diyā sā havāoñ meñ jaltā rahā

bilā-vaj.h phirnā galī meñ tirī

ki tham kar vahīñ rah ga.ī zindagī

vo kohsār vo barf par chāñdnī

udhar chāñd chaḌhtā idhar chāñdnī

vo tanhā.iyāñ dard kā vo safar

tasavvur meñ maiñ ġharq thā sar-basar

achānak jo tū ne nazar pher lī

dukhoñ kī mire dil ko jāgīr dī

kahīñ aur jā ḳhud baserā kiyā

idhar dil meñ aahoñ ne Derā kiyā

jo iz.hār ko merī āñkhoñ meñ the

vo jugnū to miTTī meñ jazb ho chuke

kaho kuchh mirī yaad aatī bhī hai

ḳhalish dil kī tujh ko satātī bhī hai

mire chār-sū hai udāsī muhīt

kahūñ kis tarah maiñ vo pahle se giit

asar kuchh bhī sheroñ meñ baaqī nahīñ

vahī bazm hai par vo saaqī nahīñ

jo guzre kabhī tujh ko merā ḳhayāl

nazar dil-girafta pe tū aa ke Daal

zamāna huā tere darshan kiye

bahut chaak siine ke maiñ ne siiye

kisī taur ab dil bahaltā nahīñ

ghaḌī-bhar ko bhī chain miltā nahīñ

sanam koī milne kī tadbīr kar

muaaf ab mire dil kī taqsīr kar

idhar tere kuche se mera guzar

bahane se wo tera le jaana ghar

zamana laDakpan ka rangin tha

ki tu sher-o-naghme ka shauqin tha

baDi der tak silsila-e-suKHan

meri shaKHsiyat mera andaz-e-fan

saraha kiya tu jo ashaar ko

tashaffi hui tere fankar ko

yahin se juDa silsila-e-hayat

badal si gai thi meri kaenat

ajab dard sine mein palta raha

diya sa hawaon mein jalta raha

bila-wajh phirna gali mein teri

ki tham kar wahin rah gai zindagi

wo kohsar wo barf par chandni

udhar chand chaDhta idhar chandni

wo tanhaiyan dard ka wo safar

tasawwur mein main gharq tha sar-basar

achanak jo tu ne nazar pher li

dukhon ki mere dil ko jagir di

kahin aur ja KHud basera kiya

idhar dil mein aahon ne Dera kiya

jo izhaar ko meri aankhon mein the

wo jugnu to miTTi mein jazb ho chuke

kaho kuchh meri yaad aati bhi hai

KHalish dil ki tujh ko satati bhi hai

mere chaar-su hai udasi muhit

kahun kis tarah main wo pahle se git

asar kuchh bhi sheron mein baqi nahin

wahi bazm hai par wo saqi nahin

jo guzre kabhi tujh ko mera KHayal

nazar dil-girafta pe tu aa ke Dal

zamana hua tere darshan kiye

bahut chaak sine ke main ne siye

kisi taur ab dil bahalta nahin

ghaDi-bhar ko bhi chain milta nahin

sanam koi milne ki tadbir kar

muaf ab mere dil ki taqsir kar