yaaden

raat ke gahre sannāTe meñ

maiñ ghar ke āñgan meñ tanhā

chāñd ko kab se dekh rahā huuñ

dil kī dīvāroñ ko kab se

ġham kī dīmak chaaT rahī hai

zehn ke lambe se kamre meñ

mere maazī kī almārī

jis ke donoñ hī dar vā haiñ

ġhaur se mujh ko dekh rahī hai

jī meñ ye aatā hai mere

maazī kī is almārī se

jis meñ burī bhalī sab yādeñ

uupar nīche chunī huī haiñ

chand suhānī yādeñ le luuñ

aur sajā luuñ dil meñ apne

lekin soch ke ye Dartā huuñ

ġham kī dīmak un yādoñ ko

do hī pal meñ chaaT na jaa.e

yādoñ kī ye pyārī shakleñ

phir maiñ kaise dekh sakūñgā!

raat ke gahre sannaTe mein

main ghar ke aangan mein tanha

chand ko kab se dekh raha hun

dil ki diwaron ko kab se

gham ki dimak chaT rahi hai

zehn ke lambe se kamre mein

mere mazi ki almari

jis ke donon hi dar wa hain

ghaur se mujh ko dekh rahi hai

ji mein ye aata hai mere

mazi ki is almari se

jis mein buri bhali sab yaaden

upar niche chuni hui hain

chand suhani yaaden le lun

aur saja lun dil mein apne

lekin soch ke ye Darta hun

gham ki dimak un yaadon ko

do hi pal mein chaT na jae

yaadon ki ye pyari shaklen

phir main kaise dekh sakunga!