yahan dildar-begam dafn hai

ek an-jānā sā Dar

jab vo paidā huī thī

us ke andar jazb thā

ek añdherī koTharī kā ḳhauf

rag rag meñ basā thā

ek ūñchā.ī se gir jaane kī dahshat

pīchhe pīchhe chal rahī thī

ek darvāze ke pīchhe jā ke chhup jaane kā shauq

zindagī kī sab se pahlī aarzū thī

khiḌkiyoñ kī oT se galiyoñ kā manzar dekhnā

zindagī kī sab se pahlī justujū thī

jab zarā sā vaqt guzrā

aql ke tāroñ kī jumbish se badan jaagā

hifāzat kā tasavvur is qadar vahshat-zada thā

ki apne jism se sharmindagī hotī rahī

phir ḳharīdāroñ kī duniyā meñ zarā sun-gun huī

dil dhaḌakne kī sadā mādūm ho kar rah ga.ī

ḳhauf ke gahne sajā kar

aur jhijak ke be-tahāshā phuul pahnā kar

ḳharīdāroñ ne us ko phir se andhī koTharī meñ qaid kar Daalā

vo jis kā ḳhauf vo bachpan se sahtī aa rahī thī

phir zarā sā hosh aayā

daur-e-nau-umrī gayā to aañkh se parda haTā

manzar nazar aane lage

paañv chaukhaT kī taraf baḌhne lage

ik qadam rakkhā hī thā ki nanhe nanhe haath ik zanjīr ban kar aa ga.e

ab vo is raste meñ hai sab jis ko rāh-e-marg kahte haiñ

munjamid āñkhoñ meñ ab manzar Thaharte hī nahīñ

ab kisī chaukhaT kī jānib paañv baḌhte hī nahīñ

nanhe nanhe haath kuchh is tarah ūñche ho ga.e

ab dastaras se duur haiñ

apnī zanjīroñ meñ ḳhud mahsūr haiñ

us kī andhī koTharī par ek katba nasb hai

''is jagah dildār-begam dafn hai

vo afīfa pārsā sābir-o-shākir so rahī hai

yahāñ se ġhair mardoñ kā guzarnā man.a hai

barā.e fātiha jo aanā chāhe aa.e

lekin duur se paḌh le''

ek an-jaana sa Dar

jab wo paida hui thi

us ke andar jazb tha

ek andheri koThari ka KHauf

rag rag mein basa tha

ek unchai se gir jaane ki dahshat

pichhe pichhe chal rahi thi

ek darwaze ke pichhe ja ke chhup jaane ka shauq

zindagi ki sab se pahli aarzu thi

khiDkiyon ki oT se galiyon ka manzar dekhna

zindagi ki sab se pahli justuju thi

jab zara sa waqt guzra

aql ke taron ki jumbish se badan jaga

hifazat ka tasawwur is qadar wahshat-zada tha

ki apne jism se sharmindagi hoti rahi

phir KHaridaron ki duniya mein zara sun-gun hui

dil dhaDakne ki sada madum ho kar rah gai

KHauf ke gahne saja kar

aur jhijak ke be-tahasha phul pahna kar

KHaridaron ne us ko phir se andhi koThari mein qaid kar Dala

wo jis ka KHauf wo bachpan se sahti aa rahi thi

phir zara sa hosh aaya

daur-e-nau-umri gaya to aankh se parda haTa

manzar nazar aane lage

panw chaukhaT ki taraf baDhne lage

ek qadam rakkha hi tha ki nanhe nanhe hath ek zanjir ban kar aa gae

ab wo is raste mein hai sab jis ko rah-e-marg kahte hain

munjamid aankhon mein ab manzar Thaharte hi nahin

ab kisi chaukhaT ki jaanib panw baDhte hi nahin

nanhe nanhe hath kuchh is tarah unche ho gae

ab dastaras se dur hain

apni zanjiron mein KHud mahsur hain

us ki andhi koThari par ek katba nasb hai

is jagah dildar-begam dafn hai

wo afifa parsa sabir-o-shakir so rahi hai

yahan se ghair mardon ka guzarna mana hai

barae fatiha jo aana chahe aae

lekin dur se paDh le