yahi zindagi hai

dil kī udaas nagrī meñ

jab yādoñ kī bāñsurī bajtī haiñ

to kitnī hī

uudī piilī niilī yādoñ kī shahnā.iyāñ

ehsās ke ghuñgrū bajā detī haiñ

in shahnā.iyoñ kī karb-rez o nashāt-angez āvāzeñ

kabhī ruuh ko ehsās-e-farhat ke naach nachāne par

majbūr kartī haiñ

aur kabhī

sitam-zada ḳhayālāt ke samundar kī tund-o-tez lahroñ ko

magarmachhoñ ke kartab sikhātī haiñ

phir ye magarmachh apne nokīle daañt

dil ke nihāñ-ḳhānoñ meñ paivast karke

ehsās ke motiyoñ ko nikāl kar

dimāġh ke alaav par Daal dete haiñ

aur insān rafta rafta maazī ke nasheb-o-farāz kī

aag meñ jalnā shurūa ho jaatā hai

aag kī aañch hasrat ke lohe ko

āhista āhista itnā garmā detī hai ki

āñkhoñ ke sāmne sirf dhuāñ hī dhuāñ

rah jaatā hai tāham

jab dimāġh kī tapish par rāhat kī shabnam

paḌ jaatī hai to dil meñ

masarrat kā samundar maujeñ mārnā shurūa kar detā hai

aur yahī karb-rez hasrat aur nashāt-angez yādeñ

zindagī kahlātī haiñ

dil ki udas nagri mein

jab yaadon ki bansuri bajti hain

to kitni hi

udi pili nili yaadon ki shahnaiyan

ehsas ke ghungru baja deti hain

in shahnaiyon ki karb-rez o nashat-angez aawazen

kabhi ruh ko ehsas-e-farhat ke nach nachane par

majbur karti hain

aur kabhi

sitam-zada KHayalat ke samundar ki tund-o-tez lahron ko

magarmachhon ke kartab sikhati hain

phir ye magarmachh apne nokile dant

dil ke nihan-KHanon mein paiwast karke

ehsas ke motiyon ko nikal kar

dimagh ke alaw par Dal dete hain

aur insan rafta rafta mazi ke nasheb-o-faraaz ki

aag mein jalna shurua ho jata hai

aag ki aanch hasrat ke lohe ko

aahista aahista itna garma deti hai ki

aankhon ke samne sirf dhuan hi dhuan

rah jata hai taham

jab dimagh ki tapish par rahat ki shabnam

paD jati hai to dil mein

masarrat ka samundar maujen marna shurua kar deta hai

aur yahi karb-rez hasrat aur nashat-angez yaaden

zindagi kahlati hain