yaum-e-azadi

chaman meñ naaz se aThkheliyāñ kartī bahār aa.ī

guloñ kā pairahan pahne vo jān-e-intizār aa.ī

chaman vaale sabhī fart-e-masarrat se pukār uTThe

bahār aa.ī bahār aa.ī bahār aa.ī bahār aa.ī

kahīñ kaliyoñ ko chheḌā hai kahīñ phūloñ ko chūmā hai

gale mil mil ke pattoñ se vo yuuñ rūThī bahār aa.ī

nasība jaag uTThā phir sabhī ahl-e-gulistāñ kā

diloñ kā daaġh dho dho kar vo bār-e-ġham utaar aa.ī

na.ī phir zindagī aa.ī nayā dil meñ surūr aayā

na.e sapne na.e armāñ na.ī aashā ubhār aa.ī

khulā hai mai-kade kā dar aur izn-e-ām hai sab ko

vahāñ par aaj rindoñ kī qatār andar qatār aa.ī

ga.e gulshan pe ġhairoñ ke to mauj-e-rañg-o-bū ban kar

har ik gulshan se ham ko bhī nidā-e-ḳhush-gavār aa.ī

nigāh-e-bad se dekhā hai kisī ne gar gulistāñ ko

to gul-chī kī har ik sāzish hamīñ ko sāzgār aa.ī

jinhoñ ne is chaman ko ḳhuun aur ashkoñ se sīñchā thā

bahār aa.ī to yaad un kī ham ko baar baar aa.ī

na maalī ho kabhī ġhāfil na an-ban ahl-e-gulshan meñ

tabhī samjheñge ham yāroñ haqīqat meñ bahār aa.ī

sadā apne chaman meñ daur-daura ho bahāroñ kā

'habīb' apnī zabāñ par ye duā be-iḳhtiyār aa.ī

chaman mein naz se aThkheliyan karti bahaar aai

gulon ka pairahan pahne wo jaan-e-intizar aai

chaman wale sabhi fart-e-masarrat se pukar uTThe

bahaar aai bahaar aai bahaar aai bahaar aai

kahin kaliyon ko chheDa hai kahin phulon ko chuma hai

gale mil mil ke patton se wo yun ruThi bahaar aai

nasiba jag uTTha phir sabhi ahl-e-gulistan ka

dilon ka dagh dho dho kar wo bar-e-gham utar aai

nai phir zindagi aai naya dil mein surur aaya

nae sapne nae arman nai aasha ubhaar aai

khula hai mai-kade ka dar aur izn-e-am hai sab ko

wahan par aaj rindon ki qatar andar qatar aai

gae gulshan pe ghairon ke to mauj-e-rang-o-bu ban kar

har ek gulshan se hum ko bhi nida-e-KHush-gawar aai

nigah-e-bad se dekha hai kisi ne gar gulistan ko

to gul-chi ki har ek sazish hamin ko sazgar aai

jinhon ne is chaman ko KHun aur ashkon se sincha tha

bahaar aai to yaad un ki hum ko bar bar aai

na mali ho kabhi ghafil na an-ban ahl-e-gulshan mein

tabhi samjhenge hum yaron haqiqat mein bahaar aai

sada apne chaman mein daur-daura ho bahaaron ka

'habib' apni zaban par ye dua be-iKHtiyar aai